РИГА, 21 февраль. /“Дунё” АА/. Латвия иқтисодиёт институти директори Нина Линде “Дунё” АА мухбирига Ўзбекистон Президенти Шавкат Мирзиёевнинг 17-19 февраль кунлари АҚШга амалга оширган ташрифи ва Тинчлик кенгашининг биринчи йиғилишидаги иштироки юзасидан фикр билдирди:

– Ўзбекистон Президенти Шавкат Мирзиёевнинг Тинчлик кенгаши йиғилишида иштирок этиш учун Америка Қўшма Штатларига ташрифи Ўзбекистоннинг халқаро позициясини мустаҳкамлаш ҳамда глобал тинчлик ва барқарор ривожланиш кун тартибини илгари суришдаги ролини оширишда муҳим қадамдир.

Олий даражадаги кўп томонлама форумда иштирок этиш, АҚШ сиёсий ва ишбилармон доиралари вакиллари билан икки томонлама учрашувлар ўтказишни ўз ичига олган ташрифнинг фаол дастури бундан далолат беради. Музокаралар чоғида савдо-иқтисодий, инвестициявий, технологик ва гуманитар соҳалардаги ҳамкорликни кенгайтириш истиқболлари муҳокама қилинди, бу томонларнинг узоқ муддатли стратегик шерикликни шакллантиришга интилишини акс эттиради.

Тошкентнинг очиқлик, прагматизм ва конструктив мулоқот тамойилларига асосланган изчил ташқи сиёсати дунёнинг етакчи давлатлари ишончини мустаҳкамлашга хизмат қилмоқда. Ўзбекистон Президентининг Тинчлик кенгаши мажлисидаги иштироки мамлакатимизнинг халқаро барқарорликни таъминлаш ва кўп томонлама ҳамкорликни ривожлантиришга амалий ҳисса қўшишга тайёрлигини кўрсатади.

Жаҳон иқтисодиёти ва геосиёсатида сақланиб қолаётган нотинчлик шароитида Ўзбекистоннинг минтақалараро кооперацияни ривожлантириш ва ташқи иқтисодий алоқаларни диверсификация қилишга қаратилган ташаббусларига алоҳида аҳамият бераман. Ишончим комилки, Ўзбекистон–АҚШ ҳамкорлигининг кенгайиши инвестицияларни жалб қилиш, илғор технологияларни жорий этиш ва миллий иқтисодиёт барқарорлигини ошириш учун қўшимча имкониятлар очади.

Инвестициялар ва савдо бўйича имзоланган битимлар тўплами Тошкентнинг йирик жаҳон иқтисодиёти ва инвесторлари билан иқтисодий алоқаларни мустаҳкамлашга бўлган прагматик ёндашувини акс эттиради, шунингдек, иккала иқтисодиётнинг барқарор ўсиши учун катта салоҳиятни намойиш этади, деб ҳисоблайман.

Ташрифнинг ишбилармонлик кун тартиби марказида Ўзбекистон ва АҚШ ўртасида қўшма инвестиция платформасини яратиш масалалари туради. Вашингтонда мамлакатлар етакчилари ва АҚШнинг етакчи молиявий институтлари раҳбарияти иштирокида имзоланган ушбу механизм йирик инвестиция лойиҳаларини тизимли илгари суриш ва устувор тармоқларда хусусий капиталнинг амалий иштирокини таъминлашга қаратилган. Энергетика, муҳим минераллар, инфратузилма, қишлоқ хўжалиги ва транспорт соҳалари шулар жумласидан.

Шунингдек, икки давлат ўртасида қиймати 35 миллиард доллар бўлган уч йиллик Иқтисодий ҳамкорлик дастури амал қилмоқда. Бу фикримча, тўғридан-тўғри инвестицияларни кўпайтириш ва глобал қиймат занжирларига янада чуқурроқ интеграциялашув йўлидаги муҳим қадамдир.