СЕУЛ, 22 август. /“Дунё” АА/. Жанубий Кореянинг нуфузли “Samsung Electronics Uzbekistan” компанияси бош директори Юн Сон Чан мамлакатимиз мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади.

– Компаниямиз ва шахсан ўз номимдан Ўзбекистон халқини мустақилликнинг 35 йиллиги билан самимий муборакбод этаман.

Истиқлол йилларида Ўзбекистон улкан ўзгаришлар йўлини босиб ўтди. Барқарор иқтисодий тараққиёт, халқаро ҳамкорликни кенгайтириш, илғор технологиялар ва инвестицияларни жалб этиш учун мустаҳкам замин яратилди. Бугун Ўзбекистон халқаро бизнес учун тобора очиқ, жадал ривожланаётган ва жозибадор мамлакатга айланди.

2017 йилда компаниямиз Ўзбекистонда ўз ваколатхонасини очган ва мамлакат иқтисодиётига тўғридан-тўғри инвестициялар кирита бошлаган. Шундан буён ҳамкорлигимиз изчил кенгайиб, давлат иқтисодиёти ривожига ўз ҳиссамизни қўшиб келаяпмиз.

Ўтган давр мобайнида компания томонидан мингдан ортиқ иш ўрни яратилди. 2 миллион доллардан зиёд инвестиция киритилди. Сўнгги бир йилда компаниямиз томонидан тўланган солиқлар миқдори 50 миллион доллардан ошди.

Биз учун маҳаллий ишлаб чиқаришни ривожлантириш муҳим аҳамиятга эга. Юртингизда истеъмолчилар эҳтиёжларига мос замонавий ва ҳамёнбоп электроника маҳсулотларини ишлаб чиқариш бўйича қўшма корхона ташкил этдик. Шу билан бирга, мамлакатда ишлаб чиқарилган маҳсулотларни МДҲнинг бошқа давлатлари бозорларига ҳам экспорт қилиш имконияти пайдо бўлмоқда. Бу саноат кооперациясини янада ривожлантириш ва Ўзбекистоннинг экспорт салоҳиятини кенгайтириш учун қўшимча имкониятлар яратади.

Компаниямиз келгусида ҳам Ўзбекистоннинг ишончли ҳамкори бўлиш учун астойдил ҳаракат қилади. Мамлакатингизнинг ижтимоий-иқтисодий тараққиётига ўз ҳиссамизни қўшиш ҳамда ўзбек халқи билан биргаликда тараққиётга эришиш биз учун катта шараф.

Қутлуғ шодиёна арафасида Ўзбекистон халқига тинчлик, хотиржамлик ва фаровонлик тилайман.

Биз мамлакат тараққиёт йўлининг бир қисми эканимиздан фахрланамиз ва шериклик муносабатларимизнинг келажагига катта ишонч билан қараймиз.