ТОШКЕНТ, 4 июнь. /"Дунё" АА/. Ўзбекистон Президенти Шавкат Мирзиёев Корея Республикаси Президенти Ли Чжэ Мённи ушбу лавозимга сайлангани билан табриклади ва энг эзгу тилакларини билдирди, деб хабар қилмоқда "Дунё" АА мухбири.

"Давлатимиз раҳбари ўз мактубида Ли Чжэ Мён раҳбарлигида Корея Республикасининг интеллектуал ва иқтисодий қудрати янада ўсишига, халқаро майдондаги обрў-эътибори ва нуфузи мустаҳкамланишига ишонч билдирди", – деб ёзди Ўзбекистон Президенти матбуот котиби ўзининг telegram каналида.

"Биз Корея Республикаси билан дўстона ва кенг қамровли алоқаларни янги босқичга кўтаришга алоҳида эътибор қаратамиз. Аминманки, Сизнинг Президентлик даврингизда алоҳида стратегик шериклик муносабатларимиз барча устувор соҳаларда жадал ривожланади", — дейилади мактубда.

Президентимиз мамлакатларимиз ўртасидаги кўп қиррали ва узоқ муддатли муносабатларни янада мустаҳкамлаш мақсадида Ли Чжэ Мённи ўзига қулай вақтда Ўзбекистонга расмий ташриф билан келишга таклиф этди.

"Bloomberg news" АА олган сурат