ТОШКЕНТ, 30 август. /“Дунё” АА/. Бугун Ўзбекистон Президенти Шавкат Мирзиёевнинг Беларусь Президенти Александр Лукашенко билан телефон орқали мулоқоти бўлиб ўтди, деб хабар бермоқда “Дунё” АА мухбири.

Давлатимиз раҳбари матбуот хизмати маълумотига кўра, Ўзбекистон Президенти Беларусь етакчисини таваллуд куни билан самимий табриклаб, унга мустаҳкам соғлиқ, бахт-саодат ва муваффақиятлар, дўст Беларусь халқига эса тинчлик-осойишталик ва равнақ тилади.

Ўз навбатида, Беларусь Президенти Ўзбекистон етакчиси ва кўп миллатли халқини яқинлашиб келаётган Мустақиллик куни билан самимий қутлаб, бардавом тараққиёт ва фаровонлик тилади.

Жорий йил 8-9 июль кунлари Президентимизнинг Минск шаҳрига расмий ташрифида эришилган келишувларни амалга ошириш доирасида Ўзбекистон – Беларусь стратегик шериклик муносабатларини янада ривожлантиришнинг долзарб масалалари кўриб чиқилди.

Самарали мулоқот ва алмашинувлар, шу жумладан, икки мамлакат ҳудудлари даражасида амалга оширилаётгани мамнуният билан қайд этилди.

Йил бошидан буён товар айирбошлаш ҳажми 28 фоизга ошди. Қишлоқ хўжалиги, машинасозлик, фармацевтика, электротехника, енгил саноат ва иқтисодиётнинг бошқа тармоқларида кооперация лойиҳалари амалга оширилмоқда.

Етакчилар бўлажак икки томонлама учрашув ва тадбирлар режасини ҳам муҳокама қилдилар.

Ўзбекистон Президенти матбуот хизмати архивидан олинган сурат