САМАРҚАНД, 4 май. /“Дунё” АА/. Осиё тараққиёт банкининг Хусусий сектор билан операциялар департаменти бош директори Изабель Чаттертон Самарқандда бўлиб ўтаётган ОТБ Бошқарувчилар кенгаши йиғилиши доирасида “Дунё” АА мухбирининг Ўзбекистондаги инвестиция муҳити ҳақидаги саволига жавоб берди:

– Ўзбекистон ҳукумати бутун мамлакат бўйлаб таъсирчан трансформация дастурини амалга оширди. Ушбу дастур комплекс хусусиятга эга бўлиб, айнан хусусий компаниялар томонидан яхшироқ бошқариладиган инвестицияларни хусусий секторга ўтказишга қаратилган.

Биз ушбу самарали дастурни амалга оширишда Ўзбекистон ҳукуматига ҳамроҳлик қилишдан бахтиёр ва фахрландик. Ҳукуматингиз билан кўп йиллардан бери, деярли уни концептуал ишлаб чиқиш босқичидан бошлаб ҳамкорлик қилиб келмоқдамиз ва ислоҳотлар аллақачон сезиларли яхшиланишларга олиб келганини мамнуният билан таъкидлаймиз.

Мамлакатнинг суверен кредит рейтинги халқаро агентликлар томонидан оширилди. Иқтисодий ўсиш ҳам кўп жиҳатдан ҳукумат амалга ошираётган трансформация дастурига боғлиқ. Биз ушбу дастурда ҳукуматнинг ҳамкори эканимиздан фахрланамиз.

Бундан ташқари, ушбу ташаббус минтақадаги бошқа мамлакатлар эътиборини тортди, улар энди Ўзбекистон ҳукумати ушбу дастурни қандай ишлаб чиққани ва амалга ошираётгани билан қизиқмоқда.

Ўзбекистон ҳукумати, албатта, нафақат биз билан, балки бошқа кўплаб ҳамкорлар билан ҳам стратегик ва комплекс тарзда ишламоқда. Таъкидлаш керакки, ушбу тизим ҳақиқатан ҳам иқтисодиётни аҳолига сезиларли фойда келтирадиган ва кўплаб иш ўринларини яратадиган ўсиш соҳаларига йўналтираётгани учун мақтовга лойиқ.