ТОШКЕНТ, 11 июнь. /“Дунё” АА/. Америка миграция қонунчилигини бузгани учун депортация қилинган 24 нафар Ўзбекистон фуқароси бўлган АҚШдан учган чартер рейс бугун тонгда Тошкент халқаро аэропортига қўнди, деб хабар бермоқда “Дунё” АА мухбири.

Ватандошларнинг қайтарилиши Ўзбекистон ва АҚШ ваколатли идораларининг келишилган ҳамкорлиги натижасидир. Икки томонлама ҳамкорлик доирасида фуқароларнинг шахсини аниқлаш, ҳужжатларни расмийлаштириш ва хавфсиз ташишни таъминлаш каби барча ташкилий-ҳуқуқий тартиб-таомиллар тезкорлик билан келишиб олинди.

Ўзбекистон миграция масалалари, жумладан, миграция қонунчилиги бузилишининг олдини олиш ҳамда чет элдаги Ўзбекистон фуқароларининг ҳуқуқларини ҳимоя қилиш бўйича хорижий ҳамкорлар билан ўзаро алоқаларни доимий асосда давом эттирмоқда.

Эслатиб ўтамиз, 12 май куни Стокгольмдан чартер рейс билан 20 нафар Ўзбекистон фуқароси Тошкентга олиб келинган эди.

“Дунё” АА архивидан олинган сурат