АНТАЛИЯ, 14 ноябрь. /“Дунё” АА/. Глобал яшил ўсиш институти (GGGI) молия стратегияси ва ҳамкорлик бўлими раҳбари Гулшан Вашиштха “Дунё” ААга Ўзбекистон Президентининг 10–11 ноябрь кунлари Анталия шаҳрида бўлиб ўтган БМТнинг иқлим бўйича жаҳон етакчилари саммитидаги иштироки хусусида ўз фикр-мулоҳазаларини билдирди.

– GGGI Ўзбекистон ва мамлакатдаги қатор муассасаларни барқарор молиялаштириш борасида қўллаб-қувватлаб келмоқда. Биз кенг кўламли ишларни амалга оширдик. Ўзбекистон билан ҳамкорликда эришилган натижалар кўлами 1,5 миллиард АҚШ долларидан ошди.

Хусусан, “Ўзсаноатқурилишбанк” ва “Агробанк” билан ҳамкорликда қўшма лойиҳалар устида ишладик. GGGI Ўзбекистоннинг кўплаб банкларини қўллаб-қувватлаб келмоқда ва бу нафақат мамлакат, балки бутун минтақа учун манфаатли бўлмоқда. Минтақадаги шериклар биздан Ўзбекистонда эришилган бу каби ютуқларни қандай такрорлаш мумкинлигини сўрамоқда. Шу боис бу ерда фаолият юритаётганимиздан ғоят фахрланамиз.

Бугунги кунда Ўзбекистон илгари сураётган йирик ташаббус – бу “Орол” дастуридир. Мазкур дастур иқлимга мослаштирилган қишлоқ хўжалигини ривожлантириш ҳамда биз ҳамкорлик қилаётган ЕТТБ каби кўп томонлама тараққиёт банклари билан биргаликда аграр соҳага инвестициялар киритишни кўзда тутади.

Ушбу лойиҳа жуда самарали дастурдир. Чунки у фермерлар ҳамжамиятига молиявий ресурслардан янада кенгроқ фойдаланиш имконини берувчи механизмни яратади.

Ўзбекистон фермерларини, хусусан, қишлоқ хўжалигида фаолият юритаётган хотин-қизларни қўллаб-қувватлашга доим тайёрмиз. Фикримча, мамлакатдаги фермерларнинг 40–45 фоизини аёллар ташкил этади. ЕТТБ билан биргаликда биз фермерларнинг молиявий манбалардан эркин фойдалана олишини таъминлаш чораларини кўрамиз.

Ўзбекистон Президенти бу борада зарур шарт-шароитларни яратган. Ривожланиш – бу техник кўмак демакдир: бунинг учун миллий даражада ишончли лойиҳа ва дастурлар зарур.

Яна бир муҳим масала – бу соҳага инвестиция жалб қилишдир. Шу сабабли Ўзбекистон Президентининг халқаро ташкилотларга йўллаган даъвати жуда тўғри ва ўринлидир. Шунда миллий даражада амалга оширилаётган ишларни халқаро стандартлар ва методлар билан уйғунлаштириш мумкин бўлади. Ўзбекистонга глобал молиялаштириш айнан шу йўл билан кириб келади.

Бундай лойиҳаларни тайёрлаш, уларни миллий миқёсда келишиш ва мувофиқлаштиришни эса GGGI сингари ҳукуматлараро ташкилотлар орқали олиб бориш муҳим. Шундагина биз мамлакатга халқаро молиявий маблағларни жалб қила оламиз.