СИНГАПУР, 16 июль. /"Дунё" АА/. Жорий йилнинг 12–13 июль кунлари Сингапурда "Asia Student Leadership Conference – 2025" (Осиё талабалар етакчилиги конференцияси) бўлиб ўтди, деб хабар қилмоқда "Дунё" АА мухбири.

Мазкур нуфузли тадбир ҳар йили "Smile Asia" халқаро хайрия ташкилоти ташаббуси билан ўтказиб келинмоқда. Унда дунёнинг турли мамлакатларидан энг фаол ва иқтидорли талабалар, шунингдек, ўз соҳасининг етакчи халқаро экспертлари иштирок этади.

Бу йилги конференцияда 20 дан ортиқ давлат делегациялари қаторида Ўзбекистон вакиллари – Севара Ҳасанова ва Диёра Қосимова ҳам фаол иштирок этди.

Улар тенгдошлар билан биргаликда жамоавий амалий машғулотларда, етакчилик бўйича маҳорат дарсларида қатнашиб, ўз лидерлик кўникмаларини мустаҳкамлаш имконига эга бўлдилар. Тадбир давомида Сингапур ва бошқа давлатлардан келган экспертлар ўз тажрибалари билан ўртоқлашишди.

Конференция якунида ўтказилган маданият кечасида иштирокчилар ўз давлатларининг миллий маданияти ва бой меросига бағишланган саҳна кўринишларини намойиш этди. Ўзбекистон талабалари кийган миллий атласдан тикилган либослар ва юртимиз тарихи, маданияти ва бугунги тараққиётига бағишланган тақдимот хорижий томонга катта таассурот қолдирди.

Ўзбекистон талабаларининг мазкур конференцияда иштироки ташкилотчилар ва халқаро экспертлар томонидан юксак баҳоланди. Шунингдек, Ўзбекистоннинг ёшларга оид давлат сиёсатининг амалий натижалари ҳамда ёш авлодга қаратилаётган юксак эътибор ва яратилган кенг имкониятлар эътироф этилди.