КУАЛА-ЛУМПУР, 24 июнь. /“Дунё” АА/. Мамлакатимизнинг Куала-Лумпурдаги элчихонаси ва Ўзбекистон ёшлари умумжаҳон ассоциациясининг Малайзиядаги вакиллари ҳамкорлигида “Youth Cup – 2026” футбол турнири ташкил этилди, деб хабар бермоқда “Дунё” АА мухбири.

Ватандошлар иштирокидаги ушбу мусобақа Ўзбекистон миллий терма жамоасининг 2026 йилги футбол бўйича жаҳон чемпионатидаги иштироки ҳамда юртимизда 30 июнь куни нишонланадиган Ёшлар куни муносабати билан ўтказилди.

Турнирда Малайзиянинг “Asia Pacific University of Technology and Innovation”, “Universiti Tenaga Nasional”, “Cyberjaya University”, “City University”, “UCSI University”, “Xiamen University Malaysia”, “Alfa University”, “MAHSA University”, “Lincoln University” сингари олий ўқув юртларида таҳсил олаётган талабалар қатнашди. Ғолиблик учун ўзбекистонлик талабалардан ташкил топган ўндан ортиқ жамоа баҳс олиб борди.

Мусобақа якунларига кўра, “City University” талабалари жамоаси биринчи ўринни эгаллади. Иккинчи ва учинчи ўринларни эса “UCSI University” ва “Xiamen University Malaysia” вакиллари қўлга киритди. Ғолиб ва совриндорлар кубок ҳамда дипломлар билан тақдирланди.

Беллашув доирасида Ўзбекистоннинг Малайзиядаги элчиси Каромиддин Гадоев иштирокчиларни мамлакатимизда ёшлар сиёсати ва спорт соҳасида амалга оширилаётган ислоҳотлар билан таништирди. У ёш авлоднинг ҳар томонлама камол топиши учун яратилаётган имкониятлар ҳақида батафсил тўхталиб ўтди.

Турнир нафақат спорт мусобақаси, балки ватандошлар ўртасидаги дўстлик ришталарини мустаҳкамлаш, соғлом турмуш тарзини тарғиб қилиш ва хориждаги ёшларнинг ўзаро ҳамкорлигини ривожлантириш учун ҳам майдон вазифасини ўтади. Мусобақа якунида иштирокчилар ва меҳмонлар учун анъанавий ўзбекона дастурхон ёзилди.

Иштирокчилар хориждаги ўзбекистонлик талабаларга кўрсатилаётган эътибор учун миннатдорлик билдириб, бу каби ташаббусларни келгусида ҳам давом эттириш муҳимлигини таъкидлади.

“Асли Андижонликман. Ҳозирги кунда Малайзиянинг Миллий энергетика университетида магистратура босқичида таҳсил оляпман. Бугунги тадбирда жамоалар бир-бирлари билан дўстона ва ўзаро ҳурмат асосида ўйинларни ўтказди. Биз Малайзиядаги ҳамюртлар Ўзбекистон миллий терма жамоасининг Жаҳон чемпионатидаги ўйинларини биргаликда катта қизиқиш билан кузатиб бормоқдамиз. Ушбу турнирдан кўзланган асосий мақсад – хориждаги ватандошлар ўртасида ватанпарварлик туйғуларини мустаҳкамлаш, уларнинг ўзаро жипслигини ошириш ҳамда соғлом турмуш тарзини кенг тарғиб қилишдан иборат. Малайзияда бўлиб турган ватандошларга қаратилаётган эътибордан мамнунмиз”,  дейди Ўзбекистон ёшлари умумжаҳон ассоциациясининг Малайзиядаги вакили Фарход Охунжонов.