НЬЮ-ЙОРК, 23 июнь. /“Дунё” АА/. АҚШдаги ўзбек диаспорасини жипслаштириш, ватандошлар ўртасидаги ўзаро алоқаларни ривожлантириш бўйича олиб борилаётган ишлар доирасида иккита – “Vatan New York” ва “Vatan New Jersey” янги минтақавий тузилма ташкил этилди, деб хабар бермоқда “Дунё” АА мухбири.

Янги тузилмалар АҚШдаги ўзбек диаспораси жамоалари, тадбиркорлар, жамоат фаоллари ва ёшлар ўртасидаги ҳамкорликни мустаҳкамлаш, ватандошларни қўллаб-қувватлаш ҳамда қўшма ташаббусларни амалга оширишда ягона ёндашувларни шакллантириш мақсадида аввал ташкил этилган “Vatan Global Alliance” бирлашмасининг Нью-Йорк ва Нью-Жерси штатларидаги илк ваколатхоналари бўлди.

Янги минтақавий тузилмаларни ташкил этиш тўғрисидаги қарор бирлашма фаолларининг Ўзбекистоннинг Нью-Йоркдаги Бош консулхонаси дипломатлари билан учрашуви чоғида қабул қилинди. Таъкидланишича, янги тузилмалар фаолияти ўзбек жамоаси қамровини кенгайтириш, тадбиркорлар, ёшлар ва жамоат фаолларини ижтимоий ташаббусларга жалб этиш, маданий-маърифий, таълим ва хайрия лойиҳаларини амалга ошириш, Ватан билан алоқаларни мустаҳкамлашга қаратилади.

Янги тузилмаларга муваффақиятли тадбиркор ва ўзбек жамоаси фаоли Бахтиёр Қодиров раҳбар этиб сайланди. Келажакда ташкилотлар фаолларини шакллантириш ва Нью-Йорк ҳамда Нью-Жерсидаги ватандошларни қўллаб-қувватлашга қаратилган қатор ташаббусларни амалга ошириш режалаштирилмоқда.

Учрашув иштирокчилари ўзбек жамоасининг янада жипслашиши диаспора билан ишлашни сифат жиҳатидан янги босқичга олиб чиқиш, ватандошларнинг ижтимоий ҳаётдаги иштирокини кенгайтириш ва ўзбек жамоасининг Америка жамиятидаги ўрнини мустаҳкамлашга хизмат қилишини қайд этди.

“Vatan New York” ва “Vatan New Jersey” тузилмаларининг ташкил этилиши Ўзбекистон мустақиллигининг 35 йиллиги арафасидаги муҳим қадам сифатида баҳоланди. Янги платформалар миллий анъаналарни асраб-авайлаш, тарихий Ватан билан алоқаларни мустаҳкамлаш ва ўзбек жамоасини янада жипслаштиришга қаратилган маданий, ижтимоий ва маърифий тадбирларни ватандошлар иштирокида ташкил этишда фаол қатнашиши кутилмоқда.

Келгусида “Vatan Global Alliance” тармоғини АҚШнинг ўзбекистонликлар кўп истиқомат қиладиган бошқа ҳудудларида ҳам кенгайтириш режалаштирилган. Бундай саъй-ҳаракатлар бутун мамлакат бўйлаб тадбиркорлар, жамоат фаоллари ва ёшлар салоҳиятини бирлаштириши, Қўшма Штатлардаги ўзбек диаспораси ҳаракатининг ривожланишига туртки беради.