РИМ, 6 сентябрь. /"Дунё" АА/. Ўзбекистон элчиси Абат Файзуллаев Италия университетлари ректорлари конференцияси (CRUI) бошқаруви аъзоси, Венеция Ка-Фоскари университети ректори Тициана Липпелло билан учрашди, деб хабар қилмоқда "Дунё" АА мухбири.

Мулоқот аввалида Тициана Липпелло икки мамлакат ўртасида таълим соҳасидаги ҳамкорликни янада кенгайтириш мақсадида, навбатдаги Ўзбекистон-Италия ректорлари форумига жиддий тайёргарлик кўрилаётганини маълум қилди.

Италия Бош вазири Жоржа Мелонининг жорий йил май ойида Ўзбекистонга амалга оширган расмий ташрифи давомида мазкур форумни ўтказиш бўйича келишувга эришилган эди.

2026 йилда ўтказилиши режалаштирилган ушбу тадбирда Ўзбекистон ва Италиянинг кўплаб етакчи олий таълим муассасалари ректорлари иштирок этиши кутилмоқда.

Шунингдек, учрашув давомида Италиянинг Венеция Ка-Фоскари ва Ўзбекистон давлат жаҳон тиллари университетлари ҳамкорлигида "Марко Полонинг саёҳатлари" асарининг ўзбек тилига таржима қилиш ишлари якунига етаётгани маълум қилинди.

"Ўзбекистон Ипак йўлининг қоқ марказида жойлашган ва шунинг учун ҳам бу асарнинг ўзбек тилига ўгирилиши алоҳида аҳамиятга эга. Таржима ишлари якунланиши муносабати билан Тошкент шаҳрида тақдимот тадбири ўтказиш режалаштирилган", – деди Венеция Ка-Фоскари университети ректори Тициана Липпелло.