ТОМСК, 14 октябрь. /"Дунё" АА/. Шу йилнинг 8-12 октябрь кунлари Сирдарё вилояти ҳокими ўринбосари Шоҳрух Исоқулов бошчилигидаги делегация амалий сафар билан Россиянинг Томск шаҳрида бўлди, деб хабар бермоқда "Дунё" АА мухбири.

Сафар давомида Ўзбекистон делегацияси Томск вилояти губернатори Владимир Мазур билан музокара ўтказди.

"Ўтган йил куз фаслида биз ҳамкорлик тўғрисидаги меморандумни имзолаб, кенг қамровли келишувни тайёрлашни бошладик. Бугун биз ушбу ҳужжат бўйича тўлиқ келишиб олдик. Мен уни яқин келажакда имзолашни таклиф қиламан", деди Владимир Мазур.

Унинг таъкидлашича, Битим ҳудудлараро самарали ҳамкорликни йўлга қўйиш имконини берадиган аниқ лойиҳалар билан тўлдирилиши керак. Масалан, Томск вилояти илм-фан ва технология, саноат ва бошқа соҳаларда қўшма лойиҳаларни таклиф қилиши мумкин.

Томонлар нефть-кимё саноатини ривожлантириш, электроника, туризм ва бошқа иқтисодиёт тармоқларида ҳамкорлик истиқболларини муҳокама қилди.

Ўзбекистон делегацияси Томск вилояти Савдо-саноат палатасида самарали музокаралар ўтказди. Музокараларда "Дива-М", "Милослава", "Кит", "Новохим", "Пэт сити", "Армада", "Гайтур", "Сибир Туристик" каби компаниялар раҳбарлари ва бошқалар қатнашди.

Учрашувда 2025 йил апрель ойида Томск вилояти компаниялари раҳбарлари ва тадбиркорларининг Ўзбекистонга сафари нафақат ўз тарихида биринчи бўлгани, балки ҳудудлараро ҳамкорликни янада кенгайтиришнинг реал шартларини белгилаб бергани алоҳида таъкидланди.

Гулистон шаҳрида бўлиб ўтган Халқаро инвестиция форумида иштирок этган губернаторнинг агросаноат сиёсати ва атроф-муҳитни бошқариш бўйича ўринбосари Михаил Ратнер бошчилигидаги Томск вилояти делегациясининг Ўзбекистонга сафари якунлари юқори баҳоланди.

Ўзбекистон делегацияси сафар давомида Россиянинг етакчи техника университети бўлмиш Томск политехника университети, Томск давлат университетида ва Сибир қишлоқ хўжалиги ва торф илмий-тадқиқот институти бўлди.

Сафар давомида Томск дўстлик уйида ўзбек халқининг маданий салоҳияти, миллий либослари ва ўзбек таомлари намойиш этилган тақдимот ўтказилди.