ИСТАНБУЛ, 31 октябрь. /"Дунё" АА/. Тошкент шаҳар ҳокимлиги вакилларидан иборат делегация хизмат сафари билан Туркиянинг Истанбул шаҳрида бўлди, деб хабар қилмоқда "Дунё" АА мухбири.

Хизмат сафари доирасида делегация аъзолари Истанбул шаҳар ҳокимлиги бош котиби Волкан Демир, шаҳар губернатори ўринбосари Мехмет Сулун билан учрашувлар ўтказди.

Ўзбекистон вакиллари Истанбул шаҳрининг гастрономик туризмга ихтисослашган, 7/24 тартибда фаолият юритувчи кўчалар, уларга маҳаллий бошқарув органлари томонидан тақдим этилаётган имтиёзлар, шунингдек, ушбу кўчаларни ривожлантириш стратегиялари билан яқиндан танишди.

Шунингдек, сайёҳлик масканларида жамоат тартибини сақлаш ва хавфсизлик чораларини таъминлаш бўйича Истанбул шаҳар ҳокимлиги вакиллари билан мулоқот бўлиб ўтди.

Учрашувда Истанбул шаҳрининг гастрономик ва туристлар гавжум бўлган кўчалари, шунингдек, хорижий зиёратчиларни жалб этувчи қадимий жойларда жамоат тартибини сақлаш бўйича тажрибани ўрганиш ва ҳамкорлик алоқаларини ўрнатиш юзасидан фикр алмашилди.