БУДАПЕШТ, 22 июль. /"Дунё" АА/. Ўзбекистон ички ишлар вазири Азиз Тошпўлатов бошчилигидаги делегация Будапештда Венгрия Миллий тергов бюросининг Кибержиноятчиликка қарши кураш департаменти вакиллари билан учрашди, деб хабар қилмоқда "Дунё" АА мухбири.

Музокаралар чоғида кибержиноятчиликка қарши курашиш соҳасидаги ҳамкорликнинг долзарб масалалари муҳокама қилинди, ўзаро тажриба алмашилди ва ҳамкорликнинг истиқболли йўналишлари белгилаб олинди. Кадрлар тайёрлаш тизимлари, рақамли таҳдидларга қарши курашишнинг замонавий технологиялари ва усулларидан фойдаланишга алоҳида эътибор қаратилди.

Томонлар киберхавфсизликни таъминлаш, ахборот алмашиш ва рақамли маконда жиноятларга қарши курашиш бўйича қўшма чора-тадбирларни ишлаб чиқишда халқаро ҳамкорлик муҳимлигини қайд этдилар.

Учрашув якунида икки томонлама ҳамкорликни янада ривожлантириш, тезкор алоқаларни ўрнатиш ва киберхавфсизлик соҳасида мунтазам тажриба алмашиш бўйича келишувга эришилди.

Ўзбекистон Ички ишлар вазирлиги делегациясининг Венгрияга ташрифи икки давлат ўртасида рақамли асрда хавфсизлик соҳасида ҳамкорликни мустаҳкамлаш йўлидаги муҳим қадам бўлди.