РИМ, 26 июнь. / "Дунё" АА/. Ўзбекистон Вазирлар Маҳкамаси ҳузуридаги Агросаноат мажмуи устидан назорат қилиш инспекцияси ("Ўзагроинспекция") делегацияси жорий йилнинг 16-20 июнь кунлари амалий сафар билан Италияда бўлди, деб хабар қилмоқда "Дунё" АА мухбири.

Мазкур сафар Ўзбекистон элчихонаси ва  Италия қишлоқ хўжалиги тадқиқотлари ва иқтисодий таҳлили кенгаши кўмагида ташкил этилди.

Мамлакатимиз делегацияси БМТ Озиқ-овқат ва қишлоқ хўжалиги ташкилоти (ФАО) бош қароргоҳида бўлиб, Ўсимликлар генетикаси ресурслари бўйича халқаро шартнома котибияти билан учрашув ўтказди. Унда Ўзбекистон ва ФАО ўртасидаги кенг ҳамкорлик кўлами эътироф этилиб, мамлакатимизнинг ушбу халқаро шартномага аъзо бўлиш имконияти ва истиқболлари муҳокама қилинди.

Италия қишлоқ хўжалиги, озиқ-овқат суверенитети ва ўрмончилик вазирлигида бўлиб ўтган учрашувда "Ўзагроинспекция" делегацияси учун уруғчиликни сертификатлаш бўйича тақдимот ўтказилди.

 Шунингдек, томонлар ўртасида ушбу соҳада ҳамкорлик ўрнатиш, жумладан, қонунчиликни такомиллаштириш, хорижий экспертларни жалб қилиш, рақамлаштириш ва ахборот алмашишни йўлга қўйиш каби масалалар юзасидан фикр алмашилди.

Юртимиз делегацияси аъзолари Италиянинг Милан ва Болонья ҳудудлари ҳам бўлдилар. Сафар давомида Италия Қишлоқ хўжалиги тадқиқотлари ва иқтисодий таҳлили кенгашининг махсус лабораториялар фаолияти ўрганилди. Италия билан уруғчилик ва сертификатлаштириш соҳасида ўзаро ҳамкорлик ҳужжати имзоланди.

Бундан ташқари, Ўзбекистонда қишлоқ хўжалиги экинлари уруғчилигини халқаро стандартларга мослаштириш, норматив-ҳуқуқий ҳужжатларни такомиллаштириш ва уни самарали амалга ошириш бўйича ҳамкорлик қилишга келишиб олинди.