ДЕҲЛИ, 29 декабрь. /"Дунё" АА/. Хоразм вилояти ҳокими Жўрабек Раҳимов Ҳиндистоннинг "Amtrak Technologies Pvt. Ltd." компанияси директори Сандип Арья билан учрашди, деб хабар қилмоқда "Дунё" АА мухбири.

Мулоқот чоғида Хоразм вилояти ва мазкур ҳинд компанияси билан ҳамкорлик алоқаларини ривожлантириш, инвестициялар жалб қилиш, ахборот технологиялари йўналишида қўшма таълим дастурларини амалга ошириш ва бошқа масалалар юзасидан фикр алмашилди.

Шунингдек, мамлакатимизда хорижий етакчи компаниялар ва сармоядорлар фаолияти учун яратилган қулай муҳит ҳақидаги маълумотларга алоҳида эътибор қаратилди.

"Amtrak Technologies Pvt. Ltd." Ўзбекистон билан яқин ҳамкорлик ришталарини ўрнатган. Хусусан, компания Жаваҳарлаъл Неру номидаги Ўзбекистон-Ҳиндистон ахборот технологиялари маркази, Ўзбекистон-Ҳиндистон тадбиркорликни ривожлантириш маркази, Қуролли кучлар академиясида компьютер лабораторияси синфини жиҳозлаш каби лойиҳаларни ҳаётга татбиқ этишда фаол қатнашган.