ДЕҲЛИ, 11 июнь. /“Дунё” АА/. Ҳиндистоннинг “India Blooms” ахборот агентлиги V Тошкент халқаро инвестиция форумига (TIIF-2026) бағишланган мақола чоп этди, деб хабар бермоқда “Дунё” АА мухбири.

Электрон нашр яқинлашиб келаётган форумни бутун минтақанинг амалий инвестиция кун тартиби шаклланадиган макон сифатида тавсифлаган.

Агентликнинг қайд этишича, TIIF-2026 Ўзбекистоннинг Марказий Осиё иқтисодий ривожланишининг узоқ муддатли қоидалари ва йўналишларини белгилаб беришга қодир бўлган “минтақавий инвестиция хаби” сифатидаги мавқеини мустаҳкамлайди. “Форум реал инвестициявий ечимларни ишлаб чиқувчи барқарор механизмга айланди”, деб ёзган муаллиф.

“India Blooms” 2025 йилдаги форум натижалари мазкур тадбир ривожланишнинг янги босқичига ўтганини яққол намойиш этганини таъкидлайди. TIIF-2025да 100 га яқин мамлакатдан 8 мингдан ортиқ делегат иштирок этгани ва имзоланган инвестиция битимларининг умумий ҳажми 30,5 миллиард АҚШ долларига етганлигига эътибор қаратилган.

Агентлик иштирокчилар сонининг ортиб бораётгани, географиянинг кенгаяётгани ва тузилган битимлар ҳажмининг ўсаётгани халқаро бизнеснинг Ўзбекистон инвестиция муҳитига бўлган ишончи сезиларли даражада мустаҳкамланганидан далолат беришини урғулаган.

Нашрда форумнинг амалий аҳамиятига алоҳида эътибор қаратилган. TIIF-2026 давлат ва ҳукумат раҳбарларидан тортиб халқаро молия институтлари, суверен фондлар ва йирик корпорациялар вакилларигача бўлган муҳим иқтисодий ва сиёсий қарор қабул қилувчи шахслар билан тўғридан-тўғри алоқа ўрнатиш имконини беради.

“India Blooms” баҳосига кўра, форум доирасида давлат, инвесторлар ва бизнес ягона маконда жамланадиган ноёб муҳит шаклланади, бу эса умумий муҳокамалардан ҳамкорликнинг аниқ форматларига ўтиш имконини тақдим этади.

Электрон манба бўлажак форумнинг юқори вакиллик мақомини, жумладан, Марказий Осиё ва Европа мамлакатлари давлат ва ҳукумат раҳбарлари, халқаро ташкилотлар ва кўп томонлама ривожланиш банклари, шунингдек, суверен фондлар ва экспорт-кредит агентликлари етакчилари иштирокини қайд этган. “India Blooms” бундай таркиб Ўзбекистондаги изчил ислоҳотлар, глобал молия институтлари ва хусусий капитал ўртасида тўғридан-тўғри боғлиқликни таъминлашини таъкидлаган.

Мақолада Тошкент халқаро инвестиция форуми минтақавий иқтисодий ривожланиш тузилмасига таъсир кўрсатадиган амалий инвестиция экотизимига узил-кесил айлангани қайд этилган.

Ҳиндистон ахборот агентлигининг баҳолашича, TIIF-2026 Ўзбекистоннинг глобал инвестиция архитектурасидаги ролини мустаҳкамлаш ва унинг халқаро капитал бозорларига интеграциялашувини янада кенгайтиришнинг навбатдаги босқичи ҳисобланади.