КУАЛА-ЛУМПУР, 26 май. /“Дунё” АА/. Ўзбекистон элчиси Каромиддин Гадоев “SME Corporation Malaysia” давлат агентлиги бош ижрочи директори Ризал бин Наини билан учрашди, деб хабар бермоқда “Дунё” АА мухбири.

Мулоқот чоғида Ўзбекистоннинг соҳага масъул идоралари ва Малайзия давлат агентлиги ўртасида тадбиркорликни қўллаб-қувватлашни янги босқичга олиб чиқиш масаласида фикр алмашилди. Шу билан бирга, кичик ва ўрта бизнес субъектларини бошқаришда икки томонлама тажриба алмашишни кенгайтириш истиқболлари атрофлича кўриб чиқилди.

Ризал бин Наини ўзбек томонининг Малайзиянинг соҳадаги энг илғор амалиётини чуқур ўрганиш ва уни Ўзбекистон иқтисодиётига татбиқ этиш бўйича илгари сурган ташаббусларини тўлиқ қўллаб-қувватлади.

Хориж томони Малайзияда тадбиркорларга кўрсатилаётган хизматлар тизими, кичик ва ўрта бизнес субъектларининг рақобатбардошлигини баҳоловчи SCORE (SME Competitiveness Rating for Enhancement) инструменти ва унинг методологияси, соҳани молиялаштиришнинг замонавий институционал асослари юзасидан яқиндан ҳамкорлик қилишга тайёрлигини билдирди.

Учрашув якунида ҳамкорликнинг аниқ йўналишлари ва амалий механизмларини белгилаб олиш мақсадида яқин кунларда соҳа мутахассислари иштирокида онлайн музокаралар ташкил этишга келишилди.

1996 йилда Малайзия Тадбиркорлик ва кооперативларни ривожлантириш вазирлиги (MECD) ҳузурида ташкил этилган “SME Corp.” агентлиги бугунги кунда мамлакат миқёсида микро, кичик ва ўрта тадбиркорлик субъектлари учун ягона давлат сиёсатини ишлаб чиқувчи, стратегик ташаббусларни мувофиқлаштирувчи ва молиявий қўллаб-қувватлаш тизимини бошқарувчи бош ташкилот ҳисобланади.