ИСЛОМОБОД, 21 ноябрь. /"Дунё" АА/. Ўзбекистон элчиси Алишер Тўхтаев Покистоннинг "TCS" транспорт-логистика компанияси раҳбари Халид Аван билан учрашув ўтказди, деб хабар қилмоқда "Дунё" АА мухбири.

Мулоқот чоғида Ўзбекистоннинг логистик имкониятларидан унумли фойдаланиш, янги инфратузилма объектларини барпо этиш, юкларни етказиб беришнинг самарали йўналишларни шакллантириш, соҳадаги ҳамкорлик жараёнларига хорижий шерикларни жалб қилиш шартлари муҳокама қилинди.

"Ўзбекистон Президенти ташаббуси ва қатъий сиёсий иродаси билан мамлакатларимиз ва минтақаларимиз ўртасида узилиб қолган ришталар қайта тикланмоқда. Биз Ўзбекистонни Марказий Осиёдаги қулай логистик хаб сифатида кўрамиз. Унинг транзит имкониятларидан самарали фойдаланган ҳолда Жанубий Осиё, МДҲ ва Европа мамлакатларига чиқиш ва юк ташувлари географиясини кенгайтириш – компаниямизнинг асосий мақсади", – деди Халид Аван.

Покистон вакили Марказий ва Жанубий Осиё йўналишидаги транспорт-логистика операцияларини кенгайтиришнинг янги механизмлари, мамлакатнинг "Карачи", "Гвадар" ва "Қосим" портлари ҳамда Ўзбекистон ҳудудлари ўртасида юкларни ташиш бўйича интеграциялашган логистика ечимлари устида ишлаётганини маълум қилди ва ушбу жараёнга хорижлик шерикларини жалб этиш таклифини илгари сурди.

Учрашувда интеграциялашган логистика ечимлари мавжуд инфратузилма объектларини модернизация қилиш ва янгиларини барпо этишни молиялаштириш, логистика бошқаруви жараёнларини рақамлаштиришга инвестиция киритишни кўзда тутиши таъкидланди.

Шунингдек, "TCS" раҳбари ижтимоий-маданий алоқаларни чуқурлаштириш мақсадида Ўзбекистон ва Покистонда ягона лойиҳа асосида тарихий транспорт музейини барпо этишга тайёрлигини билдирди.