СТОКГОЛЬМ, 19 ноябрь. /"Дунё" АА/. Ўзбекистон "Ўзэлтехсаноат" уюшмаси, Марказий Осиё экология ва иқлим ўзгариши тадқиқотлари университети ҳамда Швециянинг "Epishine" компанияси вакиллари ўртасида онлайн учрашув ўтказилди, деб хабар қилмоқда "Дунё" АА мухбири.

1996 йилда Швециянинг Линчёпинг шаҳрида ташкил этилган "Epishine" компанияси органик қуёш батареяларини ишлаб чиқариш билан шуғулланади.

Мулоқот жараёнида Ўзбекистонда электротехника саноати, энергия тежовчи ва "яшил" технологиялар соҳасида олиб борилаётган ислоҳотлар, хорижий компанияларнинг бизнес очиши учун яратилган шарт-шариоит ва имкониятлар ҳақида маълумот берилди.

"Epishine" компаниясининг халқаро маркетинг директори Флорент Пеллиссиер ўзбек электротехника компаниялари билан инновацион маҳсулот асосида ишлаб чиқариш бўйича кооперация ҳамкорлигини йўлга қўйишга тайёрлигини билдирди. Шунингдек, компаниянинг ҳамтаъсисчиси "Linköping University" илмий муассасаси билан бирга илмий-техникавий алоқаларни ўрнатишдан манфаатдорлигини билдирди.

Суҳбат давомида тежамкор инновацион батарея технологиясини жалб этиш ва локализация қилиш, бу йўналишда тадқиқот лойиҳа ташаббусларини биргаликда ишлаб чиқиш масалалари муҳокама қилинди.

Томонлар ишлаб чиқаришни йўлга қўйиш мақсадида ўзбек маҳаллий корхоналар ("Артель", "Премьер" ва б.) билан музокара ўтказиш ҳамда "Epishine" компанияси раҳбарининг Ўзбекистонга ташрифини ташкил этиш бўйича дастлабки келишувларга эришди.

Шунингдек, Марказий Осиёдаги биринчи эко-университет – "Green University" ва "Linköping University" ўртасида қўшма ўқув дастурлар, илмий тадқиқотлар ва талабалар алмашинувини йўлга қўйиш бўйича тегишли чора-тадбирлар ишлаб чиқилади.