МИНСК, 27 октябрь. /“Дунё” АА/. Беларусда амалий ташриф билан бўлиб турган Тошкент вилояти ҳокими Зоир Мирзаев бошчилигидаги делегация Минск вилояти ижроия қўмитаси раиси Алексей Кушнаренко билан учрашди, деб хабар бермоқда “Дунё” АА мухбири.

Мулоқот чоғида икки ҳудуд ўртасидаги савдо-иқтисодий алоқаларни фаоллаштириш ва янги ҳамкорлик йўналишларини белгилаш юзасидан фикр алмашилди.

Музокараларда фармацевтика соҳасида савдони йўлга қўйиш, Тошкент вилоятида мебелсозлик ва ёғоч уйлар қурилишига бўлган эҳтиёждан келиб чиқиб, ёғочни қайта ишлаш тармоғида қўшма лойиҳаларни амалга ошириш масалаларига алоҳида тўхталиб ўтилди.

Шунингдек, қишлоқ хўжалигида картошка ва қанд лавлаги етиштириш бўйича Беларусь тажрибасини татбиқ этиш имкониятларига эътибор қаратилди. Томонлар барча ташаббусларни ўз ичига олувчи қўшма “Йўл харитаси”ни тайёрлашга келишиб олди.

Сафар дастури доирасида делегация аъзолари ушбу мамлакатда меҳнат қилаётган ватандошларимиз билан ҳам учрашиб, уларнинг фаолияти ва яратилган шарт-шароитлар билан яқиндан танишди. Шу билан бирга, тошкентлик тадбиркорлар томонидан Беларусда амалга оширилаётган инвестиция лойиҳалари кўздан кечирилди.

Икки томонлама ҳамкорликни кенгайтириш мақсадида Тошкент вилоятида “МАЗ” бренди остидаги юк техникаларига хизмат кўрсатиш маркази ва эҳтиёт қисмлар омборини ташкил этиш масаласи муҳокама қилинди.