ТОШКЕНТ, 16 октябрь. /"Дунё" АА/.  Шу йил 12 ноябрь куни Тошкент шаҳрида Халқаро мультимодал транспорт форуми бўлиб ўтади, деб хабар қилмоқда "Дунё" АА мухбири Транспорт вазирлиги маълумотига таяниб.

 Тадбир ташкилотчилари – Ўзбекистон Транспорт вазирлиги, Туркий давлатлар ташкилоти, Логистика марказлари ва юк ташувчилар Альянси.

Форум конструктив мунозаралар, ахборот алмашиш ва мультимодал транспорт йўналишларини ривожлантиришни таъминлаш бўйича қўшма ташаббусларга кўмаклашишга қаратилган.

Ушбу юқори даражадаги учрашувда асосий эътибор транспорт йўлакларини ривожлантириш, логистикада рақамли ечимларни интеграциялаш, транзит салоҳиятини ошириш, транспорт соҳасида яшил технологияларни илгари суриш бўйича ҳар томонлама муҳокама қилинади.

Дастур қуйидаги йўналишлар бўйича тематик панель сессияларини ўз ичига олади:

- трансчегаравий логистика ва божхона қоидалари;

- Рақамлаштириш ва платформа технологиялари;

- инвестиция ва инфратузилма лойиҳалари;

- Экологик барқарор ёндашувлар ва "яшил логистика".