КУАЛА-ЛУМПУР, 28 сентябрь. /“Дунё” АА/. Куала-Лумпурда Ўзбекистон журналистика ва оммавий коммуникациялар университети ҳамда Малайзиянинг “UCSI University” ўртасида ҳамкорлик меморандуми имзоланди, деб хабар бермоқда “Дунё” АА мухбири.

Ҳужжатни ЎзЖОКУ ректори Шерзодхон Қудратхўжа ҳамда “UCSI Group” ва “UCSI University” вакиллари Питер Нг ва Ҳамиза бинти Тапсир имзолади.

Томонлар таълим ва илмий лойиҳаларни биргаликда амалга ошириш, халқаро таълим грантларида иштирок этиш ва академик алмашинув дастурларини ривожлантиришга келишиб олди.

1986 йилда ташкил этилган “UCSI University” Малайзиядаги етакчи хусусий ОТМлар қаторига киради. “QS World University Rankings 2026” рейтингида университет 269-ўринни эгаллаган.

Университетнинг Куала-Лумпур, Бандар-Спрингхилл ва Кучингда кампуслари, учта мамлакатда хорижий филиаллари мавжуд. Унда 120 дан ортиқ мамлакатдан 20 мингга яқин талаба таҳсил олмоқда.

“UCSI University” ахборот технологиялари, бизнес, муҳандислик, тиббиёт, фармацевтика, архитектура, туризм, мусиқа, санъат ва дизайн соҳалари бўйича 150 дан ортиқ бакалавриат ва магистратура дастурларини таклиф этади.