ВЕНА, 23 октябрь. /“Дунё” АА/. Наркотиклар ва ўқотар қуролларни назорат қилиш агентлиги директори ўринбосари Жобир Азимов бошчилигидаги Ўзбекистон делегацияси Вена шаҳрида бўлиб ўтаётган БМТнинг Трансмиллий уюшган жиноятчиликка қарши конвенцияси иштирокчи давлатлари конференциясининг 13-сессиясида иштирок этмоқда, деб хабар бермоқда “Дунё” АА мухбири.

Олий даражадаги тадбир доирасида Ўзбекистон делегацияси жиноятчиликнинг олдини олиш, жиноий одил судлов тизимини мустаҳкамлаш ва халқаро ҳамкорликни ривожлантириш бўйича мамлакатнинг устувор йўналишлари белгилаб берилган миллий баёнотни тақдим этди.

Учрашувда инсон ҳуқуқларига сўзсиз риоя қилган ҳолда, жиноятлар оқибатларига қарши курашишдан уларнинг барвақт олдини олиш, хавф-хатарларни аниқлаш ва замонавий технологияларни жорий этишга ўтиш зарурлиги таъкидланди.

Аҳолининг заиф қатламлари ва ёшларни ҳимоя қилиш, коррупция ҳамда гиёҳвандлик моддаларининг трансмиллий ноқонуний айланмасига қарши курашиш, киберхавфсизликни таъминлаш ва ҳуқуқни муҳофаза қилувчи идоралар имкониятларини кенгайтириш асосий йўналишлар сифатида алоҳида кўрсатиб ўтилди.

Наркожиноятчиликка қарши курашиш миллий тизимини такомиллаштириш, бу борада стратегия қабул қилиш ва БМТнинг Наркотиклар ва жиноятчилик бўйича бошқармаси (БМТ НЖБ) билан ҳамкорлик алоқаларини ўрнатишга алоҳида эътибор қаратилди.

Тошкентда БМТ НЖБ билан ҳамкорликда Ахборот марказининг ташкил этилиши, Наркотаҳдидларга қарши курашиш бўйича Самарқанд халқаро форумининг ўтказилиши ҳамда ШҲТнинг Хавфсизликка таҳдид ва хатарларга қарши курашиш бўйича марказининг иш бошлаши Ўзбекистоннинг амалий ташаббуслари қаторида қайд этилди.

Ўзбекистон рақамли хавфсизлик соҳасида халқаро ҳамкорликни ривожлантиришга тайёрлигини билдирди. 2025 йил октябрь ойида мамлакат БМТнинг Кибержиноятчиликка қарши конвенциясини имзолади, 2026 йил март ойида эса 2026–2030 йилларга мўлжалланган Киберхавфсизлик стратегиясини қабул қилди.

Миллий баёнотда мамлакатнинг ахборот ва илғор тажриба алмашинувини кенгайтириш, давлатлар ўртасидаги мувофиқлаштиришни мустаҳкамлаш, минтақавий ва халқаро ҳамкорликни ривожлантиришга тайёрлиги таъкидланди.

Шунингдек, Ўзбекистон 2027 йилда БМТнинг Коррупцияга қарши конвенцияси иштирокчи давлатлари конференциясининг 12-сессиясини, 2031 йилда эса БМТнинг Жиноятчиликнинг олдини олиш ва жиноий одил судлов бўйича 16-конгрессини қабул қилишга тайёргарлик кўраётганини маълум қилди.

Конференциянинг 13-сессияси трансмиллий таҳдидлар тобора ортиб бораётган, рақамли технологиялардан жиноий мақсадларда фойдаланиш, гиёҳвандлик моддаларининг ноқонуний айланмаси, одам савдоси ва коррупция кучаяётган бир шароитда ўтмоқда.

БМТ маълумотларига кўра, тадбирда 1 500 нафардан ортиқ киши, хусусан, 65 дан зиёд мамлакатнинг тегишли вазирлик ва идоралари раҳбарлари даражасидаги вакиллари, шунингдек, халқаро экспертлар ва нодавлат ташкилотлар вакиллари иштирок этмоқда.

Эслатиб ўтамиз, Палермо конвенцияси номи билан танилган БМТнинг Трансмиллий уюшган жиноятчиликка қарши конвенцияси БМТ Бош Ассамблеяси томонидан 2000 йил 15 ноябрда қабул қилинган ва 2003 йил 29 сентябрда кучга кирган. 2026 йил октябрь ҳолатига кўра, 195 та давлат унинг иштирокчиси ҳисобланади.