ТОКИО, 26 август. /“Дунё” АА/. Япониянинг “Sojitz” корпорацияси Директорлар кенгаши раиси ва бош директори Масаёси Фудзимото мамлакатимиз мустақиллигининг 35 йиллиги арафасида “Дунё” ахборот агентлигига интервью бериб, Ўзбекистон халқига ўзининг самимий табрик ва эзгу тилакларини йўллади.

– Бу йил юртимизда мустақилликнинг 35 йиллиги ҳамда Янги Ўзбекистондаги кенг кўламли ислоҳотлар бошланганининг 10 йиллиги нишонланмоқда. Кўп вақтдан буён мамлакатимиздаги ўзгаришларни кузатиб келаётган киши сифатида амалга оширилаётган саъй-ҳаракатларни қандай баҳолайсиз?

– Дарҳақиқат, сўнгги 10 йил ичида Ўзбекистонда кенг кўламли ислоҳотлар амалга оширилиб, мамлакат тараққиёти изчил юксалиб бораяпти.

Президент Шавкат Мирзиёев раҳбарлигида Ўзбекистонда иқтисодиётни эркинлаштириш, инвестициявий муҳитни яхшилаш ва халқаро ҳамжамият билан ўзаро ҳамкорликни мустаҳкамлаш ишлари жадал суръатда олиб борилмоқда. Бундай саъй-ҳаракатлар натижасида Ўзбекистон минтақадаги энг жозибадор мамлакатлардан бирига айланди.

Ўзбекистонга илк бор ташриф буюрганимда нафақат инфратузилма ва шаҳарлар ривожи, балки ёш авлоднинг ғайрати ва шижоати ҳам менда катта таассурот қолдирган.

Айниқса, ҳукуматнинг ислоҳотларни бошлаши ва уларни ўз вақтида якунига етказиши муҳим аҳамият касб этади. Ўйлайманки, айнан шу изчиллик ва амалий натижага йўналтирилган ёндашув кўплаб хорижий компанияларнинг ишончини қозонмоқда.

– “Sojitz” корпорациясининг Ўзбекистон билан ҳамкорлиги кўп йиллик тарихга эга ва кенг кўламли соҳаларни қамраб олади. Ушбу шериклик ва қўшма лойиҳалар ҳақида ҳам тўхталиб ўтсангиз.

– Корпорациямиз ва Ўзбекистон ўртасидаги ўзаро муносабатлар 1990 йилларда бошланган. Ўз вақтида биз “Ўзбекнефтгаз” компанияси билан ҳамкорликда мамлакат энергетикаси ривожига ҳисса қўшган “Кўкдумалоқ нефть-газ конденсати конини ўзлаштириш”, “Шўртан газ-кимё мажмуасини қуриш” каби лойиҳаларни амалга оширганмиз. Шу билан бирга, Сирдарё ИЭС қурилиши лойиҳасини амалга оширишда ҳам фаол иштирок этдик.

2024 йилда Тошкент шаҳрида компаниямиз ваколатхонаси очилди. Ўша йили Ўзбекистон ҳукумати билан стратегик “Йўл харитаси”ни имзоладик. Бу энергетика, соғлиқни сақлаш ва транспорт каби кенг кўламли соҳалардаги ҳамкорликни кенгайтиришга қаратилган битим бўлиб, келгусидаги яқин алоқаларимиз учун муҳим пойдевор бўлиб хизмат қилмоқда.

– Ўзбекистон Президенти билан шахсан учрашиш шарафига муяссар бўлгансиз. Давлат раҳбари билан учрашув Сизда қандай таассурот қолдирган?

– Ўзбекистон етакчиси Шавкат Мирзиёев билан учрашиш мен учун катта шараф бўлган. Менда катта таассурот қолдирган жиҳат – бу у кишининг Ўзбекистон келажаги ҳақида жуда кенг тасаввурга эга эканидир.

Мамлакатингизда давлат раҳбарининг таклиф ва ташаббуслари асосида юрт тараққиёти учун зарур бўлган энергетика, соғлиқни сақлаш, транспорт инфратузилмаси, кадрлар тайёрлаш каби йўналишлар биргаликда кўриб чиқилаётгани, бу ишларнинг умумий натижаси бутун халқ томонидан бирдек қабул қилинаётгани қувонарли ҳолатдир.

Президентингиз хорижий компанияларга шунчаки сармоядор сифатида эмас, балки Ўзбекистоннинг узоқ муддатли ҳамкорлари сифатида қарайди. Бундай ёндашув биз ишбилармонларда катта ишонч уйғотади.

– Ўзбекистондаги улкан ислоҳотлар “Sojitz” каби йирик компанияларга қай даражада таъсир кўрсатяпти?

– Ўзбекистонда инвестиция муҳити сезиларли даражада яхшиланди. Электр станциялари ва аэропортлар модернизация қилинмоқда. Энг муҳими, йирик инфратузилма лойиҳалари узоқ муддатли истиқболни ҳисобга олган ҳолда амалга оширилмоқда. Шу боис корхоналар учун бундай йирик лойиҳаларни амалга ошириш имкониятлари ва норматив-ҳуқуқий базанинг барқарорлиги энг муҳим омиллар саналади.

Шу билан бирга, сўнгги 10 йил ичида Ўзбекистонда сармоядорлар учун кенг мулоқот майдони шаклланди. Давлат идоралари билан очиқ музокаралар, юзага келаётган муаммоларга тезкорлик билан муносабат билдириш ҳамда тадбиркорлик учун зарур қарор ва чора-тадбирларнинг қабул қилиниши туфайли бизнеснинг ривожланиши аввалгига нисбатан анча ўсди.

Айнан шу сабабли, корпорациямиз Сирдарё вилоятидаги лойиҳа ортидан Тошкентда ваколатхона очиш ва стратегик “Йўл харитаси”ни имзолаш орқали ўзининг узоқ муддатли шериклик мавқеини мустаҳкамламоқда. Бу Ўзбекистон бозорига бўлган ишонч ва мамлакат билан ҳамкорликни янада кенгайтиришга бўлган интилишимизнинг яққол ифодасидир.

– Қутлуғ айём арафасида мамлакатимиз раҳбарияти ва халқига тилакларингиз?

– Аввало, бутун Ўзбекистон халқини мустақилликнинг 35 йиллиги ва Янги Ўзбекистон ислоҳотларининг 10 йиллиги билан чин қалбимдан табриклайман.

Ўзбекистонда одамларнинг самимийлиги, меҳмондўстлиги ва меҳнатсеварлиги менда доим катта таассурот уйғотган. Юртингизда ёш ва иқтидорли инсонларнинг борлиги Ўзбекистоннинг энг катта ютуқларидан биридир.

Корпорациямиз шунчаки сармоядор эмас, балки Япония ва Ўзбекистонни боғлаб турувчи узоқ муддатли ҳамкор сифатида фаолият юритмоқда. Келгусида ҳам энергетика, соғлиқни сақлаш ва транспорт каби соҳаларда мамлакат ривожига ҳисса қўшишда давом этамиз.

Ўзбекистоннинг барқарор тараққиёти ва фаровон келажаги йўлидаги саъй-ҳаракатларига омад ва муваффақият тилайман.