ВАШИНГТОН, 4 сентябрь. /“Дунё” АА/. Ўзбекистон мустақиллигининг 35 йиллиги муносабати билан АҚШнинг Монтана штати губернатори Грег Жианфорте 2026 йил 1 сентябрни штат миқёсида расман “Ўзбекистон Мустақиллиги куни” деб эълон қилди, деб хабар бермоқда “Дунё” АА мухбири.

Губернатор томонидан имзоланган махсус прокламацияда Ўзбекистон мустақиллигининг 35 йиллиги мамлакатимиз суверенитети, бой маданий мероси ҳамда тинчлик, фаровонлик ва миллий тараққиёт сари изчил интилишларини ифода этувчи муҳим тарихий сана экани қайд этилган.

Ҳужжатда давлатимиз раҳбари томонидан олиб борилаётган кенг кўламли ислоҳотлар, Ўзбекистоннинг халқаро майдондаги фаоллиги, минтақавий ҳамкорликни мустаҳкамлаш ҳамда Марказий Осиёда барқарорликни таъминлашга қўшаётган ҳиссаси алоҳида эътироф этилган.

Ўзбекистоннинг Сиэтл шаҳрида биринчи Бош консулхонасининг очилиши тарихий воқеа экани, у Монтана штатига ҳам хизмат кўрсатиб, икки томонлама маданий, иқтисодий ва таълимий алоқаларни мустаҳкамлашга хизмат қилиши таъкидланган.

Шунга кўра, ўзбек-америка ҳамжамиятининг доимий саъй-ҳаракатлари эътироф этилиб, Монтана штати Ўзбекистон билан дўстлик ва ўзаро манфаатли муносабатларни янада ривожлантиришга тайёрлиги билдирилган.

Монтана АҚШнинг ҳудуди жиҳатдан энг йирик штатларидан бири бўлиб, юқори технологиялар, агротехнология, энергетика ва биотехнология соҳаларида улкан иқтисодий салоҳиятга эга.