КИШТИМ, 15 июль. /"Дунё" АА/. Ўзбекистон Бош консулхонаси ходимлари Россиянинг Челябинск вилояти Киштим туманида жойлашган "Русские пряники" корхонасида вақтинча ишлаётган ҳамюртларимиз билан учрашдилар, деб хабар қилмоқда "Дунё" АА мухбири.

Мулоқот чоғида сўнгги йилларда мамлакатимизда аҳолининг ижтимоий ҳимоясини кучайтириш, уларнинг бандлигини таъминлаш шунингдек, хорижий давлатларда банд аҳолининг ҳар томонлама қўллаб-қувватлаш борасида бир қатор ишлар амалга оширилаётгани таъкидланди. Юртимизда миграция масаласи давлат сиёсати даражасига кўтарилиб, мигрантлар ҳуқуқи ва манфаатини ҳимоя қилиш, уларни қўллаб-қувватлашга алоҳида эътибор қаратила бошланди. Хусусан, охирги саккиз йилда хорижда ишлаётган фуқароларга нисбатан муносабат тубдан ўзгариб, меҳнат мигрантлари билан мулоқот ўрнатилгани, уларнинг муаммо ва эҳтиёжларини ўрганиш ҳамда ҳал қилиш бўйича янги тизим жорий қилингани қайд этилди.

Шунингдек, Ўзбекистон Президентнинг "Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида"ги қарори бу борада муҳим ҳуқуқий асос бўлиб хизмат қилаётганига урғу берилди.

Иштирокчиларга консуллик хизматлари тўғрисида маълумот берилди. Россия ҳудудида қонуний ишлаш ҳуқуқини берувчи ҳужжатларни расмийлаштириш зарурати ва тартиблари тушунтирилди.

Бўлиб ўтган мулоқот якунда ҳамюртларимиз ўзларини қизиқтирган саволларга дипломатлардан атрофлича жавоб олдилар.

Эслатиб ўтамиз, шу йилнинг март ойида "Русские пряники" корхонаси билан ўтказилган музокаралар натижасида 16 нафар ҳамюртларимизни мазкур корхонада қонуний асосда ишга жойлаштириш бўйича келишувга эришилган эди.