ҚОҲИРА, 2 июнь. /"Дунё" АА/. Мисрлик машҳур тур-блогер Карим Абдулҳамид ижодий сафар билан Ўзбекистонда бўлди, деб хабар қилмоқда "Дунё" АА мухбири.

Ўзбекистоннинг Мисрдаги элчихонаси томонидан ташкил этилган сафар доирасида у Тошкент, Наманган, Самарқанд каби шаҳарларда бўлиб, мамлакатимизнинг маданий мероси, тарихий обидалари, миллий анъаналари ва халқимизнинг самимий меҳмондўстлиги ҳақида туркум видеоматериаллар тайёрлади.

Мазкур видеолавҳалар мисрлик блогернинг "Instagram", "Facebook", "TikTok" ва "YouTube" платформаларида жойлаштирилди. Эътиборлиси, юртимиз сайёҳлик салоҳияти ва тарихий меросига доир контентларни салкам 9 миллион киши кўрди.

Карим Абдулҳамиднинг мамлакатимизга ташрифи нафақат Ўзбекистоннинг туризм салоҳиятини кенг аудиторияга таништиришга, балки Миср ва бошқа араб мамлакатларидан юртимизга туристлар оқимини оширишга хизмат қилади.