БУДАПЕШТ, 10 декабрь. /“Дунё” AA/. Ўзбекистон элчихонаси томонидан Будапешт туманларида мамлакатимиз туризм имкониятини илгари суришга қаратилган акция ўтказилди, деб хабар қилмоқда “Дунё” АА мухбири.

Акция давомида Туризмни ривожлантириш қўмитаси томонидан тайёрланган ҳамда юртимизнинг туризм йўналишлари ва имкониятларини акс эттирувчи видеороликлар Будапештнинг энг гавжум кўчаларига ўрнатилган электрон экранларда намойиш этилди. Акция автомобиль магистраллари, аэропорт ва темир йўл вокзалларида ҳам ташкил этилди.

Ўтказилган тадбир Ўзбекистоннинг Европада жозибали, хавфсиз ва замонавий туристик йўналиш сифатида тан олинишини сезиларли даражада оширди.

Ушбу ташаббус мамлакатнинг ижобий халқаро имижини мустаҳкамлаш ҳамда Венгрия ва қўшни давлатлардан келадиган сайёҳлар оқимининг барқарор ўсиши учун муҳим ҳисса қўшади.