ЛОНДОН, 14 июнь. /"Дунё" АА/. Буюк Британия пойтахтида ҳаракатланадиган икки қаватли автобусларда "Ўзбекистонга хуш келибсиз"  мавзусидаги реклама баннерлари жойлаштирилди, деб хабар қилмоқда "Дунё" АА мухбири.

Мазкур лойиҳа юртимиз элчихонаси ташаббуси билан жорий йилнинг 21-22 июнь кунлари  "Tower Bridge" майдонида ташкил этиладиган "Ўзбекистон маданияти ва миллий таомлари" фестивали арафасида ташкил этилди.

Акция мамлакатимизнинг бой маданий мероси, сайёҳлик манзилларини ва гастрономик анъаналарини халқаро майдонда кенг тарғиб қилишда муҳим қадам бўлди. Шунингдек, бу каби маданий тадбирлар Ўзбекистоннинг халқаро нуфузини мустаҳкамлаш, туризмни ривожлантириш ва маданий алоқаларни юксалтиришда ҳам улкан аҳамиятга эга.

Бундан ташқари, айни пайтда "Ўзбекистон карвони" маданият ва таомлари фестивали Буюк Британиянинг 6 та шаҳрида, жумладан Эдинбург, Манчестер, Ливерпуль, Кардифф, Оксфорд ва Лондонда давом этмоқда.