ЮРМАЛА, 5 июнь. /"Дунё" АА/. Латвиянинг Юрмала шаҳрида ташкил этилган халқаро фестивалда Ўзбекистон туризм салоҳияти тақдим этилди, деб хабар бермоқда "Дунё"АА мухбири.

Тақдимот хорижий давлатларда мамлакатимиз имижини янада ошириш, миллий ўзбек урф-одат ва анъаналари ҳамда халқимизнинг меҳмондўстлигини намоён этиш, шунингдек, юртимиз туризм салоҳиятини кенг тарғиб этиш мақсадида ташкил этилди.

Унда Юрмала мэри, давлат ва жамоат ташкилотлари ҳамда ОАВ вакиллари, мазкур ҳудуддаги туркомпаниялар раҳбарлари, дипломатик корпус ҳамда ватандош талабалар иштирок этди.

Фестиваль давомида Ўзбекистоннинг туризм салоҳияти, миллий урф-одат ва анъаналарини акс эттирувчи миллий стенд ташкил этилди. Ўзбекистонлик талабалар томонидан турли маданий дастурлар намойиш этилди. Бундан ташқари, меҳмонлар учун махсус ўзбек палови тайёрланди.

Мамлакатимизнинг Самарқанд, Бухоро, Хива, Тошкент каби қадимий шаҳарларининг бой мероси ва обидалари ҳақидаги маълумотлар иштирокчиларига катта қизиқиш уйғотди. Улар диққатга сазовор жойларни кўриш учун Ўзбекистонга саёҳат қилиш истагини билдирдилар.