КУВАЙТ, 29 май. /"Дунё" АА/. Юртимизнинг Кувайтдаги элчихонасида Ўзбекистоннинг туристик салоҳиятига бағишланган давра суҳбати ўтказилди, деб хабар қилмоқда "Дунё" АА мухбири.

Унда Ўзбекистоннинг Кувайтдаги туризм элчиси, машҳур блогер Абдулкарим ал-Ҳиндал, "Unique Travel" компанияси ижрочи директори Суад ал-Маҳри, "ITL World Travel Management Co." компанияси менежери Манавар аш-Шаммари ва "Al Anwar VIP Travel & Tourism Co." компанияси менежери Али Иса иштирок этди.

Мулоқот давомида йиғилганларга Ўзбекистонда замонавий сайёҳлик инфратузилмасини ривожлантириш бўйича амалга оширилаётган тизимли чоралар, хорижий сайёҳлар учун яратилган қулайликлар, замонавий меҳмонхоналар ҳамда янги сайёҳлик йўналишлари ҳақида батафсил маълумот берилди.

Шунингдек, мамлакатимиз ҳудудидаги кўплаб тарихий обидаларнинг ЮНЕСКО Умумжаҳон мероси рўйхатига киритилгани, Ўзбекистон табиатининг гўзаллиги, юртимизнинг кўп асрлик ҳунармандчилик анъаналари ва урф-одатлари алоҳида урғуланди. Республиканинг тарихий шаҳарлари маданий дипломатия ва туризм марказига айланиб бораётгани, хусусан, 2025 йилда ЮНЕСКО Бош конференциясининг 43-сессияси Самарқанд шаҳрида ўтказилиши таъкидланди.

Бундан ташқари, юзга яқин хорижий давлатлар фуқаролари учун Ўзбекистонга визасиз кириш тартиби амал қилаётгани, жумладан, 1 июндан бошлаб Кувайт фуқаролари учун ҳам юртимизга кириш бўйича 30 кунлик визасиз тартиб жорий этилаётгани маълум қилинди.

Кувайт вакиллари ўз чиқишларида мамлакатимизда ҳукм сураётган тинчлик ва осойишталик хорижий сайёҳларнинг эмин-эркин Ўзбекистоннинг тарихий шаҳарларини зиёрат қилиши учун ажойиб имконият яратаётганини таъкидладилар.

Учрашув якунида Ўзбекистонга кувайтлик сайёҳлар оқимини янада ошириш бўйича биргаликдаги ишларни кучайтириш тўғрисида келишиб олинди.