ҚОҲИРА, 10 март. /“Дунё” АА/. Ўзбекистон дипломатлари Мисрнинг “Higher Travel”, “Exotic Travel”, “Walla Travel”, “Sky Travel” ва “Option Travel” каби етакчи сайёҳлик компаниялари вакиллари билан учрашув ўтказди, деб хабар бермоқда “Дунё” АА мухбири.

Музокаралар шунчаки расмий учрашув эмас, балки икки мамлакат ўртасидаги туристик оқимни тубдан жонлантиришга қаратилган қизғин ва стратегик мулоқот майдонига айланди.

Мисрлик туроператорлар юртимизни нафақат бой тарих ва меъморий обидалар маскани, балки бугунги кунда дунё сайёҳлик харитасидаги энг шиддат билан ривожланаётган ва хавфсиз йўналишлардан бири сифатида алоҳида эътироф этди.

Хусусан, “Higher Travel” ва “Option Travel” компаниялари раҳбарлари Ўзбекистон ҳукумати томонидан виза тизимининг либераллаштирилиши талабнинг кескин ортишига хизмат қилаётганини катта мамнуният билан таъкидлади. Уларнинг фикрича, мамлакатимизнинг бетакрор жозибаси ва юқори даражадаги сервисни таклиф эта олиши Миср бозори учун мутлақо янги имкониятдир.

Учрашув давомида “Option Travel” ва “Walla Travel” вакиллари Ўзбекистоннинг зиёрат туризми ва маданий меросига бўлган юқори қизиқишни алоҳида қайд этиб, Самарқанд, Бухоро ва Хива каби тарихий шаҳарларга сайёҳлар юборишга тайёр эканини билдирди.

Шу билан бирга, мисрлик ҳамкорлар мамлакатимизнинг замонавий қиёфаси – Тошкентнинг мегаполис сифатидаги жозибаси, Амирсой каби жаҳон стандартларидаги тоғ-курортлари ва ўзбек миллий таомларининг донғи Мисрда ҳақиқий брендга айланиб бораётганини таъкидлади. Бу йўналишларни ўз сайёҳлик дастурларига киритишга катта қизиқиш билдирди.

Мулоқот якунида туроператорлар тўғридан-тўғри алоқаларни мустаҳкамлаш учун Ўзбекистоннинг туризм салоҳиятини тарғиб қилиш, инфо-турлар ташкил этиш ва Тошкент халқаро туризм ярмаркасида иштирок этишга тайёр эканини таъкидлади.