САНКТ-ПЕТЕРБУРГ, 20 июнь. /“Дунё” АА/. Санкт-Петербург Савдо-саноат палатасида Ўзбекистоннинг сайёҳлик салоҳиятига бағишланган роуд-шоу бўлиб ўтди, деб хабар бермоқда “Дунё” АА мухбири.

Тадбир Ўзбекистоннинг Санкт-Петербургдаги Бош консулхонаси кўмагида “OksTours” ва “Транс-Логистик” компаниялари томонидан ташкил этилди.

Роуд-шоу ўзбекистонлик ҳамкорлар билан ишбилармонлик алоқаларини ривожлантиришдан манфаатдор бўлган Санкт-Петербург ва Ленинград вилоятининг 40 дан ортиқ сайёҳлик соҳаси вакилини бирлаштирди. Иштирокчилар орасида Санкт-Петербург туризмни ривожлантириш қўмитаси, Ленинград вилояти маданият ва туризм қўмитаси ҳамда “Uzbekistan Airways” АЖ вакиллари ҳам бор эди.

Меҳмонларга Санкт-Петербург Савдо-саноат палатаси Ташқи алоқалар департаменти директори Ирина Карпенко, шунингдек, Ўзбекистоннинг Санкт-Петербургдаги Бош консулхонаси ва “Uzbekistan Airways” авиакомпанияси вакиллари табрик сўзи билан мурожаат қилди.

Сўзга чиққанлар Ўзбекистон ва Россия ҳудудлари ўртасидаги икки томонлама муносабатларни ривожлантиришда сайёҳлик соҳасининг стратегик аҳамиятини таъкидлаб, сайёҳлар оқимини ошириш ва қўшма лойиҳаларни қўллаб-қувватлашдан ўзаро манфаатдор эканликларини қайд этдилар.

Тақдимот қисмида “Транс-Логистик” ва “ОксТоурс” компаниялари раҳбарлари Буюк ипак йўли шаҳарлари бўйлаб классик йўналишларни ҳамда Туркманистон ва Қозоғистонга ташрифни ўз ичига олган комбинациялашган дастурларни қамраб олган долзарб сайёҳлик таклифлари шарҳини тақдим этди.

Тақдимот доирасида Ўзбекистон транспорт инфратузилмасининг имкониятлари, янги сайёҳлик йўналишлари ва Россия бозори талабларига мослаштирилган махсус таклифлар намойиш этилди.

Шунингдек, ютуқли ўйин ҳам бўлиб ўтди. “Uzbekistan Airways” авиакомпаниясидан Ўзбекистонга иккита авиачипта, Хивадаги меҳмонхонада яшаш учун ваучер ва миллий бош кийимлар асосий ютуқлар бўлди.

Роуд-шоу бир қатор ишбилармонлик музокаралари ва якка тартибдаги учрашувлар билан якунланди. Уларнинг давомида иштирокчилар икки томонлама ҳамкорлик истиқболларини, қўшма сайёҳлик маҳсулотларини шакллантириш ҳамда Ўзбекистон, Санкт-Петербург ва Ленинград вилояти ўртасида сайёҳлик алмашинувини янада ривожлантириш чора-тадбирларини муҳокама қилдилар.