АР-РИЁЗ, 10 ноябрь. /«Дунё» АА/. Саудия Арабистони пойтахтида бўлиб ўтган «БМТ Туризм» тузилмасининг Бош ассамблеяси 26-сессиясида Бутунжаҳон туризм ташкилотнинг бош котиби лавозимига БААлик Шайха Нассер ал Новаис номзоди тасдиқланди, деб хабар бермоқда «Дунё» АА мухбири.

Нассер ал Новаис Бутунжаҳон туризм ташкилоти – UNWTOнинг 50 йиллик тарихида ташкилотни бошқарадиган биринчи аёл ва БААнинг биринчи вакили бўлди. Унинг тўрт йиллик мандати 2026 йил 1 январдан бошланиб, 2029 йил 31 декабргача давом этади. У бу лавозимда 2018 йилдан буён ташкилотга раҳбарлик қилиб келган Зураб Пололикашвилининг ўрнини эгаллайди.

Янги бош котиб туризм ва меҳмонхона бизнесида 15 йилдан ортиқ тажрибага эга. У «Ротана Ҳотелс» халқаро меҳмонхоналар гуруҳи вице-президенти, Абу-Даби Савдо палатасининг туризм бўйича ишчи гуруҳи раҳбари, Абу-Даби тадбиркор аёллар кенгаши ва Швейцариянинг «Лес Рочес Глобал Ҳоспиталитй Эдуcатион» меҳмонхона академияси кузатув кенгаши аъзоси ҳисобланади.

«Бу ғалаба – барчамизники! Муваффақиятларимиз замирида ўзаро ҳурмат, инсонпарварлик ва туризм соҳасига масъулият мужассам. Биз ҳамкорликда туризмнинг энг яхши шаклларини ишлаб чиқиб, инсониятни бирлаштиришга ҳаракат қиламиз», – дейди янги бош котиб.

Мутахассисларнинг таъкидлашича, Шайха Нассер ал Новаис номзодининг сайланиши минтақалараро ҳамкорликни мустаҳкамлашга замин яратиб, Осиё, Африка ва Марказий Осиёда барқарор туризмни ривожлантириш учун янги истиқболлар очади.