СТОКГОЛЬМ, 15 март. /«Дунё» АА/. Швециянинг нуфузли “Cawa Media” медиа-агентлиги “Ўзбекистоннинг коррупцияга қарши модели эволюцияси: ҳуқуқий ислоҳотлардан тизимли трансформация сари” номли мақола чоп этди, деб хабар бермоқда «Дунё» АА мухбири.

“Сўнгги бир неча йил ичида коррупцияга қарши муросасиз кураш Ўзбекистонда давлат сиёсати ва кенг кўламли ислоҳотлар дастурининг марказий устунларидан бирига айланган”, – дейилади унда.

Нашрнинг қайд этишича, Ўзбекистонда қонунчиликни модернизация қилиш сифатида бошланган жараёнлар бугунги кунда давлат институтлари, бошқарув усуллари ва давлат бошқаруви тизимининг кенг қамровли трансформациясига айланган.

Мақолада Ўзбекистоннинг мазкур соҳадаги асосий ютуқлари эътироф этилади. Хусусан,

- 2017 йилда “Коррупцияга қарши курашиш тўғрисида”ги қонуннинг қабул қилиниши ислоҳотларнинг бошланғич нуқтаси эканлиги ва ўтган давр мобайнида мамлакатнинг қонунчилик базасини сезиларли даражада мустаҳкамлаган 30 дан ортиқ меъёрий-ҳуқуқий ҳужжатлар ҳаётга татбиқ этилганлиги;

- Давлат даражасида манфаатлар тўқнашувининг олдини олиш қоидалари шунингдек, порахўрлик учун жиноий жавобгарлик сезиларли даражада кучайтирилганлиги;

- Ўзбекистон Республикасининг янгиланган Конституциясида коррупцияга қарши курашиш мажбуриятларининг мустаҳкамланиши энг муҳим қадам сифатида қайд этилганлиги ва бошқалар.

“Cаwа Media”нинг хулоса қилишича, коррупцияга қарши кураш тамойилларининг конституциявий мустаҳкамланиши халқаро ҳамжамиятга “Ўзбекистонда ҳалоллик энди фақат техник масала эмас - бу мутлақ давлат устуворлигидир”, деган муҳим сиёсий мессежни йўллайди.