ТОШКЕНТ, 7 май. /“Дунё” АА/. Ўзбекистон ташқи ишлар вазири Бахтиёр Саидов бугун мамлакатимизга ташриф буюрган Австриянинг Европа ва халқаро ишлар вазири Беате Майнл-Райзингер ҳамда федерал ички ишлар вазири Герхард Карнер билан учрашди, деб хабар бермоқда “Дунё” АА мухбири.

“Бугун Тошкентда Австрия ташқи ишлар вазири Беате Майнл-Райзингер ва ички ишлар вазири Герхард Карнер билан самарали учрашув бўлиб ўтди, – деб ёзди Ўзбекистон ТИВ раҳбари ўзининг telegram-каналида. – Музокаралар давомида Ўзбекистон–Австрия муносабатларини янада ривожлантириш, сиёсий мулоқотни фаоллаштириш, савдо-иқтисодий ва инвестициявий ҳамкорликни кенгайтириш масалаларига алоҳида эътибор қаратилди.

Шунингдек, хавфсизлик, миграция, таълим, туризм, “яшил” энергетика ва маданий-гуманитар соҳалардаги ҳамкорлик истиқболларини муҳокама қилдик. Австриянинг илғор тажрибаси ва технологияларини жалб қилишга ўзаро қизиқиш билдирилди.

Халқаро ва минтақавий кун тартибидаги долзарб масалалар юзасидан фикр алмашдик”.

“Дунё” АА олган сурат