РИГА, 23 апрель. /“Дунё” АА/. Латвиянинг Марказий Осиё ва Яқин Шарқ масалаларини ўрганиш институти директори Айдин Аскеров “Дунё” ААга Ўзбекистон Президентининг 21–22 апрель кунлари Остонага қилган амалий ташрифи якунлари юзасидан ўз фикр-мулоҳазаларини билдирди:

– Мазкур ташриф Ўзбекистоннинг минтақавий экологик кун тартибини илгари суриш ва Марказий Осиёда кўп томонлама ҳамкорликни мустаҳкамлаш борасидаги роли ортиб бораётганидан далолат беради. Президент Шавкат Мирзиёевнинг барқарор ривожланиш ва экологик хавфсизлик масалаларидаги фаол позицияси юксак баҳога сазовордир.

Ўзбекистон етакчисининг саммитлар чоғида иқлим ўзгаришига қарши курашиш, “яшил” технологияларни жорий этиш ва барқарор экологик сиёсатни шакллантириш бўйича минтақа мамлакатлари саъй-ҳаракатларини бирлаштиришга қаратилган янги ташаббусларига алоҳида эътибор қаратдим.

Сувдан фойдаланиш соҳасида минтақавий ҳамкорликни ривожлантириш, қайта тикланувчи энергетика бўйича лойиҳаларни кенгайтириш, экологик мониторингнинг самарали механизмларини яратишга оид ташаббуслар Ўзбекистоннинг стратегик қарашларини ва унинг Марказий Осиёдаги ижобий ўзгаришлар драйвери бўлишга тайёрлигини намоён этади.

Ўзбекистон Президентининг Остона саммитларидаги иштироки минтақавий ҳамкорликнинг янги босқичини акс эттиради. Бу босқичда Марказий Осиё мамлакатлари иқлим ўзгариши, табиий ресурслардан оқилона фойдаланиш ва экотизимларни асраш каби глобал муаммоларни биргаликда ҳал этишга тайёрлигини намойиш қилмоқда.

Ўзбекистон етакчисининг изчил сиёсати туфайли минтақада ишонч, очиқлик ва конструктив мулоқот муҳити шаклланмоқда. Бу эса қўшма экологик ва иқтисодий ташаббусларни амалга ошириш учун мустаҳкам замин яратади.

Бугунги кунда экологик дипломатия минтақавий ҳамкорликнинг муҳим йўналишига айланмоқда ва Ўзбекистон бу жараёнда асосий ўринлардан бирини эгалламоқда. Президент Шавкат Мирзиёевнинг саммитда илгари сурган ташаббуслари амалий ҳамкорликка қўшимча суръат бағишлаб, минтақадаги барча мамлакатлар манфаатлари йўлида самарали ечимлар ишлаб чиқилишига ҳисса қўшади.