ТОШКЕНТ, 11 ноябрь. /"Дунё" АА/. Бугун пойтахтимиздаги "Ўзэкспомарказ" МКМда "TransLogistica Uzbekistan – 2025" транспорт ва логистика бўйича 21-халқаро кўргазмаси иш бошлади, деб хабар бермоқда "Дунё" АА мухбири.

Шу йил 13 ноябригача давом этадиган ушбу халқаро кўргазма логистика тизимларини такомиллаштириш, транспорт инфратузилмасини ривожлантириш, транспорт ва логистика йўналишида АКТни кенг қўллаш, энг муҳими, соҳа мутахассисларини бир майдонда бирлаштириш мақсадида ўтказилмоқда.

Тадбир "Iteca Exhibitions" халқаро кўргазма компанияси ва унинг ҳамкори "ICA Eurasia Group" томонидан ташкил этилди. Унда АҚШ, БАА, Беларусь, Германия, Корея Республикаси, Латвия, Покистон, Россия, Туркия, Хитой, Швейцария, Қозоғистон, Ҳиндистон, Ўзбекистон каби давлатларнинг кўплаб машҳур компаниялари қатнашмоқда.

Мазкур кўргазма кўп йиллик тажрибага эга, Европа, МДҲ, Осиё ва Шимолий Америкада офислар тармоғига эга бўлган, халқаро транспорт ва логистика тизимидаги нуфузли, кумуш ҳомий – "ASSTRA-Associated Traffic AG" компанияси томонидан қўллаб-қувватланмоқда.

Бундан ташқари, Ўзбекистон Республикаси Олий Мажлиси Қонунчилик палатасининг Тадбиркорлик, рақобатни ривожлантириш ва саноат қўмитаси, Транспорт вазирлиги, Инвестициялар, саноат ва савдо вазирлиги, Савдо-саноат палатаси ҳамда Тошкент шаҳар ҳокимлиги ҳам кўргазманинг юқори савияда ўтишида расмий кўмакчиси сифатида фаолият юритмоқда.

2004 йилда илк бор ташкил этилган "TransLogistica Uzbekistan" кўргазмаси ҳозирда Ўзбекистондаги соҳанинг етакчи кўргазмаси бўлиб, мамлакат транспорт соҳасини ривожлантиришга катта ҳисса қўшмоқда. Кўргазманинг давлат идоралари ва тижорат ташкилотлари учун аҳамияти мавжуд йўналишларнинг ривожланиши ва ўзгариши ҳамда янги транспорт йўналишларини фаол излаш туфайли долзарб бўлиб келган.

Бу йил кўргазмада анъанавий равишда автомобиль, денгиз, темир йўл, мультимодал, ҳаво транспорти, логистика каби йирик секторларнинг турли технологиялари намойиш қилинмоқда. Электрон тижоратнинг тез ўсиши фонида тобора муҳим аҳамият касб этаётган "Омборлар ва омбор технологиялари" йўналишига алоҳида эътибор қаратилган.

Кўргазма иштирокчилари юк ташиш компаниялари, юк машиналари, контейнерлар, темир йўл вагонлари, денгиз ва ҳаво кемалари, терминаллар, омборлар ва порт инфратузилмаси эгалари билан тўғридан-тўғри мулоқот қилиш ҳамда тижорат юкларини манзилга етказиш бўйича фикр алмашмоқда.

АҚШнинг "Logenix International", Россиянинг "Даобит", "Трансмашхолдинг", Беларуснинг "APS" каби таниқли хорижий компаниялар транспорт логистикаси, машинасозлик ва таъминот занжири бошқаруви соҳасидаги замонавий ечимлар ва технологияларни тақдим этишмоқда.

Кўргазмада дебютантлар орасида Германиянинг "WR Logistics", "Artes GmbH", Туркиянинг "Mutlular Transport Limited Sirketi", "Anka Intermodal Logistics", БААнинг "Al Bayan Logistics L.L.C.", Ҳиндистоннинг "ABS Logistics Pvt. Ltd", Россиянинг "Negabaritika" ҳамда Ўзбекистоннинг "KH Lego Group. LLC" каби компанияларни учратиш мумкин. Илк бор қатнашаётган бу компаниялар халқаро ташиш, мультимодал логистика ва катта ўлчамли юкларни ташиш соҳасидаги замонавий техникаларни намойиш қилишяпти.

Маҳаллий компаниялар орасида "Uzbekistan Airports", "Uzbekistan Airways", "O'ztemiryo'lkonteyner", "Centrum Logistics Group", "FLY KHIVA", "First Dry Port Terminal" ва бошқа компаниялар иштирок этаётганини кўриш мумкин.

Латвия миллий стенди анъанавий равишда кўргазмага ташриф буюрувчиларнинг эътиборини тортади. Бу йил унда Вентспилс эркин порти бошқармаси, Рига эркин порти, Латвия темир йўллари ва Лиепая махсус иқтисодий зонаси иштирок этади. Компаниялар юк ташиш, божхона, порт ва халқаро мультимодал логистика хизматларининг тўлиқ спектрини намойиш этди.

Беларусь Республикасининг жамоавий стендида соҳанинг етакчи компаниялари – "Белинтертранс" давлат корхонаси, "Минский вагоноремонтный завод" ОАЖ, "Гомельский вагоностроительный завод" ЁАЖ, "Брестский электротехнический завод" ОАЖ, "Гомельский электромеханический завод" ОАЖ, "Genty-Spedition" МЧЖ ва "Трансавиаэкспорт" ОАЖ ҳаракатланувчи таркибни ишлаб чиқариш, таъмирлаш ва интеграциялашган логистика соҳасидаги ечимларни намойиш қиляпти.

Кўргазманинг очиқ майдонида Хитой ва Ўзбекистоннинг "Xiangyang Tenglong Automobile" ҳамда маҳаллий "Viterra" компаниялари ўз маҳсулотларини намойиш этмоқда. Бу ерга ташриф буюрувчилар сиқилган табиий газ (CNG) билан ишлайдиган "SYC6850CNG" шаҳар автобусининг 8,6 метрли модели, турли соҳа корхоналари учун мўлжалланган омборхоналар учун стеллаж тизимларини кўздан кечирмоқда.

Шунингдек, халқаро кўргазма доирасида Ўзбекистон Транспорт вазирлиги томонидан "Uzbekistan Airports, Aviation and Logistics Forum" халқаро авиация ва логистика форуми ташкил этилди.

Хуллас, иштирокчилар кўргазмада нафақат энг сўнгги технология ва ускуналарни кўриш, балки ишбилармонлик мулоқоти, янги ҳамкорлик алоқаларини ўрнатиш ва тажриба алмашиш имконига ҳам эга бўлишмоқда.