ВАШИНГТОН, 8 апрель. /“Дунё” АА/. АҚШ Покистон илтимосига биноан, Ҳўрмуз бўғози зудлик билан очилиши шарти билан Эронни бомбардимон қилишни икки ҳафтага тўхтатишини маълум қилди, деб хабар бермоқда “Дунё” АА мухбири “DW News”га таяниб.

АҚШ ва Эрон Покистон илтимосига биноан 2 ҳафталик сулҳга эришди. Бу ҳақда АҚШ Президенти Дональд Трамп ўзининг Truthsocial тармоғида ёзиб қолдирган. 

“Покистон Бош вазири Шаҳбоз Шариф ва Асим Мунир билан ўтказилган суҳбатлар асосида, улар бугун кечаси Эронга юборилаётган ҳалокатли кучни вақтинча тўхтатиб туришимни сўради. Шунингдек, Эрон Ҳормуз бўғозини тўлиқ, дарҳол ва хавфсиз очишга рози бўлиши шарти билан, мен Эронга қарши бомбардимон ва ҳужумларни икки ҳафта муддатга тўхтатишга розиман. Бу икки томонлама ўт очишни тўхтатиш бўлади! Бунинг сабаби шундаки, биз аллақачон барча ҳарбий мақсадларимизга эришдик ва ҳатто улардан ҳам ошиб кетдик.

Бундан ташқари, Эрон билан узоқ муддатли тинчлик бўйича аниқ келишувга эришиш йўлида жуда катта олдинга силжидик. Биз Эрондан 10 банддан иборат таклиф олдик ва уни музокаралар олиб бориш учун мақбул асос деб ҳисоблаймиз. Ўтган баҳсли масалаларнинг деярли барчаси АҚШ ва Эрон ўртасида келишиб олинган. Аммо икки ҳафталик муддат якуний келишувни тўлиқ расмийлаштириш ва амалга ошириш имконини беради. АҚШ Президенти сифатида, Яқин Шарқ мамлакатлари номидан ҳам айтишим мумкинки, бу узоқ йиллик муаммо ҳал этилиш арафасида тургани катта шарафли”, - деган Оқ уй раҳбари.

АҚШ маъмурияти вакили “The New York Times” газетасига АҚШнинг Эронга ҳарбий зарбалари аллақачон тўхтатилганини айтди. “CNN” телеканали Оқ уй вакилига таяниб хабар беришича, Исроил ҳам Эронга зарбаларни икки ҳафтага тўхтатишга қўшилган.

Эрон ОАВларига кўра, Теҳрон сулҳга тайёрлигини тасдиқлаган. Шу билан бирга, Эрон Вашингтонни қисқа муддатли ўт очишни тўхтатиш ўрнига урушни тўлиқ тугатиш бўйича ўн банддан иборат режасини қабул қилишга мажбур қилиб, АҚШ устидан “буюк ғалаба” қозонгани айтилмоқда.

Бу режани Эрон аввалроқ Покистон орқали АҚШга топширган, унинг бандлари орасида Эронга нисбатан санкцияларни бекор қилиш ва кемаларнинг Ҳурмуз бўғозидан ўтиши учун тўлов жорий этиш бор.

Эрон ташқи ишлар вазири Аббос Аракчи икки ҳафта ичида Эрон Қуролли кучлари билан келишилган ҳолда ва техник чекловларни ҳисобга олган ҳолда Ҳормуз бўғози кемаларнинг хавфсиз ўтиши учун очилишини маълум қилди.

“DW” маълумотларига кўра, АҚШ ва Эрон ўртасидаги музокаралар 10 апрель куни Исломободда “Америка томонига тўлиқ ишончсизлик билан” бўлиб ўтади, деб хабар берди Эрон Миллий хавфсизлик олий кенгаши.

“NBC” телеканали сурати