КУАЛА-ЛУМПУР, 6 февраль. /“Дунё” АА/. Малайзия пойтахтида Алишер Навоий таваллудининг 585 йиллиги ҳамда ЮНЕСКОнинг Бутунжаҳон туркий тиллар кунининг аҳамиятига бағишланган маданий тадбир бўлиб ўтди, деб хабар бермоқда “Дунё” АА мухбири.

Унда туркий давлатларнинг Малайзиядаги дипломатик ваколатхоналари вакиллари иштирок этди.

Ўзбекистон элчиси Каромиддин Гадоев иштирокчиларга Алишер Навоийнинг туркий тил хазинасига қўшган бебаҳо ҳиссаси, уни давлат тили даражасига кўтаргани ҳақида тўхталиб ўтди.

Шу билан бирга, Низомий Ганжавийдан кейин айнан Навоий туркий тилда “Хамса” ёзгани, бу тилда йирик ҳажмли ва мукаммал бадиий асарлар яратиш мумкинлигини яна бир бор исботлагани ҳақида сўз юритди.

Қолаверса, 2025 йил ноябрь ойида Самарқандда бўлиб ўтган ЮНЕСКО Бош конференциясининг 43-сессиясида қабул қилинган Бутунжаҳон туркий тиллар кунини таъсис этиш тўғрисидаги резолюция туркий тиллар ривожида муҳим воқеа бўлгани таъкидланди. Ушбу ҳужжат ҳозирги глобаллашув шароитида тиллараро ва цивилизациялараро ҳамжиҳатлик, турли халқлар ўртасидаги дўстликнинг ишончли кафолати ва тасдиғи экани эътироф этилди.

Бундан ташқари, Ўрхун-Энасой ёдгорликлари, Алишер Навоий, Юнус Эмро, Абай, Фузулий, Махтумқули каби буюк мутафаккирлар ижодидаги бебаҳо мерос туркий тилларнинг бойлиги экани қайд этилди.

Ўзбекистон ҳукумати ушбу ноёб меросни янада ривожлантириш, туркий тилларнинг ажралмас қисми бўлган ўзбек тилининг нуфузини янада ошириш, унинг илм-фан, дипломатия ва халқаро мулоқотдаги ўрнини мустаҳкамлашга қаратилган изчил сиёсат олиб бормоқда.

Анжуманда сўзга чиққан Туркия элчиси Амир Салим Юксел Ўзбекистон ҳукуматига туркий тилларни ривожлантиришга қўшган ҳиссаси учун алоҳида ташаккур билдирди. У Бутунжаҳон туркий тиллар кунини ўтказиш ҳақидаги қарор Самарқандда ўтказилган ЮНЕСКО Бош конференциясида қабул қилингани Ўзбекистонда  туркий тилларни янада юксалтиришда самарали чора-тадбирлар амалга оширилаётганидан далолат эканини эътироф этди.

Турк дипломатининг фикрича, узоқ кутилган ушбу тарихий ҳужжат туркий давлатларнинг ўзаро ҳамжиҳатлиги ва маданий бирлигини мустаҳкамлашда янги босқични бошлаб беради.

Тадбир давомида Алишер Навоий, Абдулла Орипов, Хуршид Даврон ижодидан намуналар ижро этилди. Туркий давлатлар вакиллари Малайзияда ушбу тадбирни мунтазам равишда ўтказиш ҳамда шу йил 15 декабрда Куала-Лумпурда Бутунжаҳон туркий тиллар куни тўғрисидаги резолюциянинг бир йиллигини биргаликда кенг нишонлашга келишиб олди.