САМАРҚАНД, 6 май. /“Дунё” АА/. Осиё тараққиёт банки ва Саудия Арабистонининг “АCWА Power” компанияси Бухоро вилоятида қуввати 300 мегаватт бўлган “Баш-2” шамол электр станцияси лойиҳасини амалга ошириш учун 116 миллион АҚШ доллари миқдорида молиялаштириш тўғрисидаги битимни имзолади, деб хабар бермоқда “Дунё” АА мухбири.

Лойиҳанинг молиявий пакети Осиё тараққиёт банки (ОТБ)нинг оддий капитал ресурсларидан 50 миллион доллар, ОТБ етакчи ташкилотчи ва букруннер сифатида иштирок этиши орқали тижорат кредиторларидан жалб қилинган 41 миллион доллар, шунингдек, “LEAP 2” жамғармасидан ажратилган 25 миллион долларни ўз ичига олади.

Лойиҳа доирасида ҳар бирининг қуввати 8 МВтгача бўлган 39 та шамол турбинасини, кучланиши 35/500 киловольтли янги подстанцияни ва станцияни миллий энергия тизимига улаш учун тахминан 1,5 километр узунликдаги электр узатиш линиясини қуриш режалаштирилган.

ОТБнинг хусусий сектор билан ишлаш бўйича бош директори Изабел Чаттертон таъкидлашича, лойиҳа мамлакатнинг энергетик барқарорлигини мустаҳкамлаш, карбонат ангидрид чиқиндиларини камайтириш ва янги юқори малакали иш ўринларини яратиш имконини беради.

Унинг сўзларига кўра, ОТБ томонидан Ўзбекистонда қўллаб-қувватланаётган бошқа шамол энергетикаси ташаббуслари билан бирга банк томонидан мамлакатда молиялаштириладиган қувватларнинг умумий ҳажми 2 гигаваттдан ошади.

Қурилиш даврида лойиҳа камида 800 та иш ўрни яратиши, фойдаланишга топширилгач эса камида 25 та доимий иш ўрнини таъминлаши кутилмоқда. Қайта тикланувчи энергетика соҳасида аёллар ва қизлар иштирокини кенгайтиришга, жумладан, шамол энергетикаси объектларига таништирув сафарларини уюштиришга алоҳида эътибор қаратилади.

“ACWA Power” компанияси асосчиси ва бошқаруви раиси Муҳаммад Абунайяннинг қайд этишича, лойиҳанинг амалга оширилиши Ўзбекистоннинг тоза энергетикани ривожлантиришга содиқлигини тасдиқлайди ҳамда минтақада шамол энергетикаси лойиҳаларининг сармоявий жозибадорлигини намоён этади.

Ҳозирда компания дунёнинг 15 та мамлакатида энергетика ва сувни чучуклаштириш соҳасидаги лойиҳаларни амалга ошириб келмоқда. ОТБ аввалроқ компаниянинг Ўзбекистондаги бир қатор энергетика лойиҳаларини, жумладан, “Баш”, “Жанкелди” ва “Нукус-2” шамол электр станциялари ҳамда “Самарқанд-1” ва “Самарқанд-2” қуёш электр станциялари лойиҳаларини қўллаб-қувватлаган эди.