БУХАРЕСТ 29 октябрь. /"Дунё" АА/. Ўзбекистон элчиси (қароргоҳи Варшава шаҳрида жойлашган) Амирсаид Агзамходжаев Руминия Вазирлар Маҳкамаси ҳузуридаги Инвестиция ва ташқи савдо агентлиги вице-президенти Дору-Клаудиан Фрунзулица билан музокара ўтказди, деб хабар қилмоқда "Дунё" АА мухбири.

Музокаралар давомида автомобилсозлик, қишлоқ хўжалиги, ветеринария, электротехника, фармацевтика, тўқимачилик, кимё саноати, IT хизматлари ва транспорт-логистика соҳаларида қўшма инвестиция лойиҳаларини амалга ошириш масалалари муҳокама қилинди.

Икки давлат ўртасидаги савдо-иқтисодий ва инвестициявий ҳамкорликни янада кенгайтириш ҳамда ҳукуматлараро иқтисодий кенгаш фаолиятини тиклаш ва унинг навбатдаги йиғилишини ўтказишга алоҳида эътибор қаратилди.

Шунингдек, томонлар Шарқий ва Марказий Осиёдан Европага мультимодал юк ташишда "Ўрта йўлак"нинг ажралмас қисми бўлган Руминиянинг Константа порти имкониятларидан фойдаланиш юзасидан фикр алмашдилар.