БУДАПЕШТ, 14 июнь. /"Дунё" АА/. Ўзбекистон элчиси Ойбек Шахавдинов Венгриянинг спорт оламида машҳур "Sportfive Hungary" компанияси бош директори Андраш Игаз билан учрашди, деб хабар бермоқда "Дунё"АА мухбири.

Унда Ўзбекистонда футбол инфратузилмасини янада ривожлантиришда ўзаро ҳамкорликни йўлга қўйиш имкониятлари муҳокама қилинди.

Андраш Игаз сўнгги йилларда Ўзбекистонда профессионал ва оммавий футбол жадал ривожланаётганини, буни мамлакат терма жамоалари ва клубларининг халқаро майдонда қўлга киритаётган ютуқлари исботлашини таъкидлади. У, шунингдек, Ўзбекистон томони билан футбол инфратузилмасини ривожлантириш йўналишида ҳамкорлик қилишга тайёрлигини билдирди. Маълум қилинишича, "Sportfive Hungary" компанияси бутун дунё бўйлаб стадионларни лойиҳалаш, қуриш ва спорт иншоотларини оператив бошқарувини амалга оширади, савдо ва маркетинг билан шуғулланади. Шунингдек, мазкур компания Венгрияда иккита стадионни бошқаради ва "Ференцварош" футбол клубига ҳомийлик қилади.

Мулоқот давомида Будапештда Ўзбекистон ва Венгрия футбол клублари ўртасида ўртоқлик учрашувини ташкил қилиш, футболчиларни хорижга трансфер қилиш ва стадионларни оператив бошқариш йўналишларида алоқаларни йўлга қўшиш масалаларига алоҳида эътибор қаратилди.