БАНГКОК, 27 март. /“Дунё” АА/. Таиланднинг Чианг Рай вилоятида Пиллачилик департаменти томонидан ташкил этилган “Матодан ҳаёт сифатини ривожлантиришгача” мавзусидаги йирик кўргазма ва халқаро семинар бўлиб ўтди, деб хабар бермоқда “Дунё” АА мухбири.

Мазкур нуфузли тадбирда Таиланд Пиллачилик департаменти бош директори Сараню Пулларп, Ижтимоий ривожланиш ва инсон хавфсизлиги вазирлиги доимий котиби ўринбосари Туэанжай Конгсомбат ҳамда соҳа мутахассислари иштирок этдилар.

Кўргазма доирасида Чианг Май Қиролича Сирикит Пиллачилик маркази томонидан ипакнинг ноёб навлари, маҳаллий ўсимликлардан олинган табиий бўёқлар ёрдамида матога ранг бериш усуллари ҳамда халқаро “Royal Peacock” (Қироллик товуси) белгиси билан сертификатланган ипак маҳсулотлари намойиш этилди.

Тадбирда иштирок этган Ўзбекистон бош консули Фахриддин Султонов Таиланд Қироличаси Ипакчилик департаментининг собиқ маслаҳатчиси Танялак Проммани билан биргаликда ипакчилик соҳасида халқаро ҳамкорликни кучайтириш ва маҳсулотларни глобал бозорга олиб чиқиш истиқболлари ҳақида сўз юритди.

Бош консул ўз нутқида Буюк Ипак йўлининг тарихий аҳамиятига алоҳида тўхталиб ўтди. Қайд этилганидек, ушбу қадимий йўл нафақат савдо тармоғи, балки Шарқ ва Ғарб ўртасида маданий, бадиий ва илмий ютуқлар алмашнуви учун хизмат қилган беқиёс кўприк бўлган. Шунингдек, тадбир иштирокчиларига Ўзбекистоннинг замонавий сайёҳлик салоҳияти ва ипакчилик анъаналари ҳақида батафсил маълумот берилди.

Ўзбекистон вакилларининг ушбу форумдаги фаол иштироки Таиланд ОАВда кенг ёритилди. Маҳаллий мутахассисларнинг фикрича, бу каби маданий-иқтисодий мулоқотлар Таиланд ва Ўзбекистон ўртасидаги ипакчилик тармоқларини боғлаш ва глобал бозорда янги имкониятларни яратишга хизмат қилади.