БУДАПЕШТ, 11 февраль. /“Дунё” АА/. Ўзбекистон элчиси Ойбек Шахавдинов Венгрия Бош прокурори Габор Балинт Надь билан учрашув ўтказди, деб хабар бермоқда “Дунё” АА мухбири.

Музокаралар чоғида томонлар ҳуқуқни муҳофаза қилиш соҳасидаги икки томонлама ҳамкорликнинг бугунги ҳолати ва истиқболларини, шунингдек, икки давлат бош прокуратуралари ўртасидаги ҳамкорликни ривожлантириш масалаларини кўриб чиқдилар. Институционал алоқаларни мустаҳкамлаш, тажриба алмашиш ва ҳамкорлик механизмларини такомиллаштиришга алоҳида эътибор қаратилди.

Венгрия томони мамлакатимиз билан шериклик муносабатларини кенгайтиришдан манфаатдорлигини тасдиқлади ҳамда прокуратура фаолияти соҳасида мулоқотни янада чуқурлаштириш ва илғор тажриба алмашишга тайёрлигини билдирди.

Бундан ташқари, Ўзбекистон Бош прокурорининг Венгрияга эҳтимолий ташрифини ташкил этиш масаласи муҳокама қилинди. Ушбу ташаббус шартномавий-ҳуқуқий базани янада ривожлантириш ва икки томонлама ҳамкорликни мустаҳкамлаш нуқтаи назаридан кўриб чиқилмоқда.

Учрашув якунида томонлар ҳамкорликни изчил кенгайтириш ва конструктив мулоқотни давом эттиришга ўзаро интилишларини тасдиқладилар.