ТАЙЧЖОУ, 4 сентябрь. /“Дунё” АА/. Ўзбекистоннинг Шанхай шаҳридаги Бош консулхонаси вакиллари Чжэцзян провинцияси Тайчжоу шаҳрига хизмат сафарини амалга оширди, деб хабар бермоқда “Дунё” АА мухбири.

Ташриф доирасида дипломатлар Тайчжоу профессионал-техника коллежи директори ўринбосари Чжоу Вэихуа, “Zoje Sewing Machine” компанияси директори Ли Хуэ ҳамда “Yusine Group” компанияси директори Ланс Ван билан учрашди.

Чжоу Вэихуа билан ўтказилган мулоқот чоғида юртимиз техникумларининг ўқитувчи ва талабалари учун тўқимачилик саноати, электромобилларни таъмирлаш, янги энергетика, сунъий интеллект, тиббиёт ва бошқа йўналишлар бўйича қисқа муддатли курслар ташкил этиш бўйича келишувга эришилди.

Коллеж директори талабалар алмашинувини йўлга қўйишга тайёрлигини билдирди. Ўзбекистон талабалари бир йил давомида коллежда таҳсил олиши ва Тайчжоу шаҳри корхоналарида амалий тажриба орттириши мумкин.

“Zoje Sewing Machine” компанияси директори Ли Хуэнинг сўзларига кўра, Ўзбекистон тўқимачилик соҳасидаги имкониятларини ҳисобга олган ҳолда, сўнгги 3 йил ичида компаниянинг йирик ҳамкорига айланди.

Ҳар йили компания Ўзбекистонга 2 миллион доллар миқдоридаги тикув машиналари ва асбоб-ускуналарини экспорт қилади. Ҳозирда компания республика ҳудудида тикув машиналарини ишлаб чиқаришни йўлга қўйиш ва кейинчалик Марказий Осиё минтақаси бозорига экспорт қилиш имкониятларини ўрганмоқда.

Хитойлик ишбилармонлар жорий йил октябрь ойида Ўзбекистонга ташриф буюриб, Касбий таълим агентлиги ва техникумлар билан учрашувлар ўтказиш бўйича ўз таклиф ва ташаббусларини маълум қилди.