ОСЛО, 28 октябрь. /“Дунё” АА/. Мамлакатимиз элчихонаси ташаббуси билан Ўзбекистон делегацияси илк бор “Oslo Innovation Week 2026” тадбирида иштирок этди, деб хабар бермоқда “Дунё” АА мухбири.

“Oslo Innovation Week” Норвегиядаги инновациялар, сунъий интеллект, рақамли трансформация, барқарор ривожланиш, “яшил” технологиялар, инвестициялар ва стартаплар экотизими соҳаларига ихтисослашган йирик тадбир ҳисобланади.

Юртимиздан Рақамли технологиялар вазирлиги, Самарқанд ва Жиззах вилоятлари, “IT Park Uzbekistan” ҳамда хусусий IT-компаниялар вакилларидан иборат делегация шакллантирилди.

Сафар давомида вакилларимиз “Oslo Science Park” илмий-инновацион паркига борди. У ерда делегация аъзолари стартаплар экотизими, илмий тадқиқотлар ва инновацион ечимлар соҳасидаги фаолият билан танишди. Ҳафталикнинг очилиш маросими “Mesh Youngstorget” стартаплар хабида бўлиб ўтди.

Ўзбекистон вакиллари “Startuplab Summit”, “Creating Better Startups”, “Tech on the Menu”, “China Connect Oslo”, “Innovation District”, “International VC Night”, “AI Mission Hub” ва “Oslo Innovation Fest” каби асосий ҳамда қўшимча тадбирларда қатнашди.

Ушбу тадбирлар давомида сунъий интеллект, иқлим ва энергетика инновациялари, озиқ-овқат саноатини рақамлаштириш, стартаплар экотизимини ривожлантириш ҳамда венчур инвестицияларини жалб этишга қаратилган илғор ечимлар ва халқаро тажрибалар тақдим этилди.

Шунингдек, “Sensoeconomic”, “AgriTech Nordic”, “Volúr”, “Microsoft Norway”, “Fieldmind”, “Heilos Robotics”, “GS1 Norway”, “Resilienza Holding” ва “Epicenter” каби компаниялар вакиллари билан учрашувлар ташкил этилди.

Суҳбатлар чоғида иқтисодиёт тармоқларида рақамли технологиялар ва сунъий интеллектдан фойдаланиш, ишлаб чиқариш жараёнларини оптималлаштириш, ресурслар самарадорлигини ошириш ва технологик инновацияларни амалиётга жорий этиш масалалари муҳокама қилинди.