БЕРЛИН, 26 октябрь. /“Дунё” АА/. Ўзбекистоннинг Германиядаги элчихонасида мамлакатимизнинг ахборот технологиялари салоҳиятига бағишланган “Uzbekistan Outsourcing Conference” конференцияси бўлиб ўтди, деб хабар бермоқда “Дунё” АА мухбири.

Элчихона кўмагида “IT Park Uzbekistan” агентлиги томонидан Германия шарқий иқтисодиёти қўмитаси билан ҳамкорликда ташкил этилган тадбирда 100 дан ортиқ киши — Германияда фаолият юритувчи 70 дан ортиқ IT-компания раҳбарлари, тадбиркорлар, экспертлар ва маҳаллий журналистлар иштирок этди. Ўзбекистондан “IT Park Uzbekistan” раҳбарияти бошчилигидаги делегация ташриф буюрди.

Элчи Дилшод Аҳатов ўз нутқида мамлакатимизда рақамлаштириш ва IT соҳасида эришилган ютуқлар, хорижий компаниялар ҳамда инвесторлар учун яратилган қулай шароитлар ҳақида сўзлаб берди. У германиялик ишбилармонларни Ўзбекистондаги лойиҳаларда янада фаол иштирок этишга чақирди. “IT Park Uzbekistan” раҳбари Азамат Караматов эса технопарк фаолияти, “Zero Risk” дастури, солиқ имтиёзлари, IT-визалар, кадрлар салоҳияти ва немис компанияларининг ўзбек бозорига кириб келиш тажрибаси хусусида батафсил маълумот берди.

 Германия шарқий иқтисодиёти қўмитаси бошқарув директори Михаэль Хармс икки мамлакат бизнес доиралари ўртасидаги алоқалар кенгаяётганини таъкидлаб, саноатга сунъий интеллектни жорий этиш, IT-хизматлар ва саноат аутсорсинг соҳаларида улкан ҳамкорлик салоҳияти мавжудлигини қайд этди.

Анжуманнинг иккинчи қисми “Ўзбекистон ва Германия: глобал хизматлар соҳасида янги шерикликни шакллантириш” номли панель сессиясига бағишланди. “IT Park Uzbekistan” билан аллақачон ҳамкорлик қилаётган немис компаниялари ўз натижаларини тақдим этди, шунингдек, Ўзбекистон делегацияси қатор йирик Германия компаниялари билан B2B учрашувларини ўтказди.

Тадбир доирасида “IT Park Uzbekistan” ва тил ўқитиш компанияси “Berlitz Deutschland GmbH” ўртасида IT-парк мутахассисларига чет тилларини, хусусан немис тилини ўргатиш бўйича англашув меморандуми имзоланди.