ПРАГА, 28 октябрь. /“Дунё” АА/. Ўзбекистон дипломатлари Чехия геология хизмати директори Зденек Венера билан учрашув ўтказди, деб хабар бермоқда “Дунё” АА мухбири.

Учрашувда  Чехия Бош вазири Андрей Бабишнинг 2026 йил 29–30 апрель кунлари Ўзбекистонга расмий ташрифи чоғида эришилган келишувлар ва имзоланган ҳужжатларни амалга ошириш масалаларига алоҳида эътибор қаратилди.

Хусусан, ташриф доирасида Ўзбекистон Тоғ-кон саноати ва геология вазирлиги ҳамда Чехия геология хизмати ўртасида имзоланган ҳамкорлик меморандуми икки мамлакат ўртасида геология соҳасидаги алоқаларни кенгайтириш учун муҳим пойдевор бўлиб хизмат қилаётгани таъкидланди.

Зденек Венера мазкур ташриф икки томонлама муносабатларни, жумладан, геология ва минерал ресурслар соҳасидаги ҳамкорликни янги босқичга кўтариш учун муҳим имконият яратганини қайд этди. Унинг сўзларига кўра, имзоланган меморандум томонлар ўртасида ўзаро манфаатли ҳамкорликни ривожлантириш, мавжуд илмий-техник салоҳиятдан самарали фойдаланиш ва аниқ амалий ташаббусларни илгари суриш учун мустаҳкам замин яратади.

Суҳбат чоғида геологик хариталаш, геокимёвий тадқиқотлар ва истиқболли конларни ўрганиш соҳаларида ҳамкорликни кенгайтириш имкониятлари муҳокама қилинди. Томонлар қўшма геологик лойиҳаларни ишлаб чиқиш ҳамда соҳада илғор тажриба ва замонавий технологиялар алмашинувини ривожлантириш муҳимлигини қайд этдилар.

Учрашувда Ўзбекистон ва Чехиянинг тегишли ташкилотлари ўртасида тўғридан-тўғри мулоқотни фаоллаштириш, ҳамкорликнинг устувор йўналишларини белгилаш ва истиқболли ташаббусларни биргаликда ишлаб чиқишга тайёрлик билдирилди.

Мазкур мулоқот Ўзбекистон ва Чехия ўртасида геология соҳасидаги ҳамкорликни янада мустаҳкамлаш, шунингдек, эришилган келишувларнинг амалий натижадорлигини таъминлаш йўлидаги муҳим қадам бўлди.